Mustadrak al-Hakim

سیدہ ام خالد بنت خالد رضی اللہ عنہا سے روایت ہے کہ نبی کریم صلی اللہ علیہ و آلہ وسلم کے پاس کچھ کپڑے لائے گئے جن میں ایک چھوٹی سیاہ خمیصہ (نقش و نگار والی چادر) تھی، آپ صلی اللہ علیہ و آلہ وسلم نے فرمایا: ”تمہارا کیا خیال ہے کہ میں یہ چادر کسے پہناؤں؟“ تو لوگ خاموش رہے، پھر رسول اللہ صلی اللہ علیہ و آلہ وسلم نے فرمایا: ”میرے پاس ام خالد کو لاؤ۔“ وہ کہتی ہیں کہ مجھے لایا گیا تو آپ صلی اللہ علیہ و آلہ وسلم نے اسے اپنے مبارک ہاتھوں سے مجھے پہنایا اور فرمایا: «أَبْلِي وأخْلِفي» ”اسے پرانا کرو اور پھر اللہ تمہیں اس کا نعم البدل عطا فرمائے (یعنی تمہاری عمر دراز ہو)۔“ آپ صلی اللہ علیہ و آلہ وسلم نے یہ بات دو بار فرمائی، اور آپ صلی اللہ علیہ و آلہ وسلم خمیصہ میں موجود زرد اور سرخ نقش و نگار کو دیکھنے لگے اور فرمانے لگے: ”اے ام خالد! یہ «سَنَا» ہے۔“ اور «سَنَا» حبشی زبان میں خوبصورت کو کہتے ہیں۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ: الْبُيُوعِ/حدیث: 2398]