Mustadrak al-Hakim

ام المومنین سیدہ ام سلمہ رضی اللہ عنہا سے روایت ہے کہ وہ میری (باری کی) وہ رات تھی جس میں رسول اللہ صلی اللہ علیہ و آلہ وسلم نے میرے ہاں قیام فرمانا تھا، پس وہب بن زمعہ اور ان کے ساتھ بنو ابی امیہ کے ایک شخص قمیص پہنے ہوئے میرے پاس آئے، تو نبی کریم صلی اللہ علیہ و آلہ وسلم نے وہب سے دریافت فرمایا: ”اے ابو عبداللہ! کیا تم نے طوافِ افاضہ کر لیا ہے؟“ انہوں نے عرض کیا: نہیں اللہ کی قسم اے اللہ کے رسول! آپ صلی اللہ علیہ و آلہ وسلم نے فرمایا: ”اپنے اوپر سے یہ قمیص اتار دو۔“ راوی کہتے ہیں کہ انہوں نے اپنے سر کی طرف سے قمیص اتار دی اور ان کے ساتھی نے بھی اپنی قمیص اتار دی، لوگوں نے عرض کیا: اے اللہ کے رسول! ایسا کیوں؟ آپ صلی اللہ علیہ و آلہ وسلم نے فرمایا: ”بلاشبہ تمہیں یہ رخصت دی گئی ہے کہ جب تم جمرہ کی رمی کر لو تو تمہارے لیے وہ سب چیزیں حلال ہو جائیں جن سے تمہیں روکا گیا تھا سوائے عورتوں کے، لیکن اگر تم بیت اللہ کا طواف کرنے سے پہلے شام کر لو (یعنی سورج غروب ہو جائے) تو تم دوبارہ اسی طرح محرم بن جاؤ گے جیسے جمرہ کی رمی سے پہلے تھے یہاں تک کہ تم طواف کر لو۔“
ابوعبیدہ کہتے ہیں کہ مجھ سے ام قیس نے بھی یہ حدیث بیان کی ہے۔ [المستدرك على الصحيحين/أَوَّلُ كِتَابِ الْمَنَاسِكِ/حدیث: 1820]