Mustadrak al-Hakim

ابو رافع بیان کرتے ہیں کہ ہم سیدنا ابو موسیٰ اشعری رضی اللہ عنہ کے پاس گئے تو وہ مغرب کے بعد پچھنے لگوا رہے تھے، میں نے عرض کیا: ”آپ نے یہ کام دن کے وقت کیوں نہ کیا؟“ انہوں نے فرمایا: ”کیا تم مجھے یہ کہتے ہو کہ میں روزے کی حالت میں اپنا خون بہاؤں؟! میں نے رسول اللہ صلی اللہ علیہ و آلہ وسلم کو یہ فرماتے سنا ہے: پچھنے لگانے والے اور لگوانے والے دونوں کا روزہ ٹوٹ گیا۔“
میں نے ابوعلی حافظ کو کہتے سنا کہ میں نے عبدان اہوازی سے پوچھا: کیا یہ بات درست ہے کہ نبی کریم صلی اللہ علیہ و آلہ وسلم نے روزے کی حالت میں پچھنے لگوائے؟ انہوں نے جواب دیا: میں نے عباس عنبری سے سنا کہ علی بن مدینی فرماتے تھے کہ ابوموسیٰ سے مروی ابو رافع کی یہ حدیث صحیح ثابت ہے کہ نبی کریم صلی اللہ علیہ و آلہ وسلم نے فرمایا: ”پچھنے لگانے والے اور لگوانے والے دونوں کا روزہ ٹوٹ گیا۔“ یہ حدیث شیخین کی شرط پر صحیح ہے لیکن انہوں نے اسے روایت نہیں کیا، اور اس باب میں صحابہ کی ایک جماعت سے ایسی معتبر اسانید مروی ہیں جن کی تفصیل یہاں طویل ہو جائے گی۔
میں نے ابوالحسن احمد بن محمد عنزی کو کہتے سنا کہ عثمان بن سعید دارمی فرماتے تھے کہ میرے نزدیک ثوبان اور شداد بن اوس کی حدیث ”پچھنے لگانے والے اور لگوانے والے کا روزہ ٹوٹ گیا“ صحیح ثابت ہے اور میں اسی کے مطابق فتویٰ دیتا ہوں، اور میں نے امام احمد بن حنبل کو بھی اسی کا قائل پایا کہ ان کے نزدیک بھی ثوبان اور شداد کی روایات صحیح ہیں۔ [المستدرك على الصحيحين/كِتَابُ الصَّوْمِ/حدیث: 1583]