Mustadrak al-Hakim

سیدنا ایاس بن سلمہ اپنے والد (سیدنا سلمہ بن اکوع رضی اللہ عنہ) سے روایت کرتے ہیں کہ وہ رسول اللہ صلی اللہ علیہ و آلہ وسلم کے ساتھ تھے جب ایک شخص اپنی ایک بانجھ گھوڑی کو ہنکاتے ہوئے آپ صلی اللہ علیہ و آلہ وسلم کے پاس آیا جس کے ساتھ اس کی ایک بچھڑی بھی پیچھے پیچھے چل رہی تھی، اس شخص نے پوچھا: آپ کون ہیں؟ آپ صلی اللہ علیہ و آلہ وسلم نے فرمایا: ”میں نبی ہوں۔“ اس نے پوچھا: نبی کیا ہوتا ہے؟ آپ صلی اللہ علیہ و آلہ وسلم نے فرمایا: ”اللہ کا رسول۔“ اس نے پوچھا: قیامت کب قائم ہوگی؟ تو رسول اللہ صلی اللہ علیہ و آلہ وسلم نے فرمایا: ”(یہ) غیب ہے، اور اللہ کے سوا کوئی غیب نہیں جانتا۔“ اس نے کہا: مجھے اپنی تلوار دکھائیے، چنانچہ نبی کریم صلی اللہ علیہ و آلہ وسلم نے اسے اپنی تلوار دے دی، اس شخص نے اسے (ہوا میں) لہرایا اور پھر آپ صلی اللہ علیہ و آلہ وسلم کو واپس کر دی، تو رسول اللہ صلی اللہ علیہ و آلہ وسلم نے فرمایا: ”یاد رکھو! تم اس کام کی طاقت نہیں رکھتے تھے جس کا تم نے ارادہ کیا تھا (یعنی قتل کا)۔“ راوی کہتے ہیں کہ اس شخص نے پہلے ہی یہ کہہ دیا تھا کہ میں اس کے پاس جاؤں گا اور اس سے ان خصلتوں کے بارے میں سوال کروں گا۔
یہ حدیث صحیح ہے لیکن ان دونوں نے اسے روایت نہیں کیا، حالانکہ ان دونوں کا «اياس بن سلمه عن ابيه» سے احتجاج کرنے پر اتفاق ہے، اور امام مسلم نے بعینہ اسی سند سے احتجاج کرتے ہوئے احمد بن یوسف سے متعدد احادیث روایت کی ہیں۔ [المستدرك على الصحيحين/كِتَابُ الْإِيمَانِ/حدیث: 14]