Mustadrak al-Hakim

سیدنا ابوہریرہ رضی اللہ عنہ سے روایت ہے کہ میں کوہِ طور گیا تو وہاں کعب الاحبار سے ملا، میں نے انہیں رسول اللہ صلی اللہ علیہ و آلہ وسلم کی احادیث سنائیں اور انہوں نے مجھے تورات کی باتیں سنائیں، ان میں کوئی اختلاف نہیں تھا یہاں تک کہ جب میں نے جمعہ کے دن کا ذکر کیا تو میں نے کہا کہ رسول اللہ صلی اللہ علیہ و آلہ وسلم نے فرمایا: ”ہر جمعہ کے دن میں ایک ایسی گھڑی ہے کہ کوئی مومن بندہ اسے نماز کی حالت میں پائے اور اللہ سے کسی چیز کا سوال کرے تو اللہ اسے وہ ضرور عطا کرتا ہے“، کعب نے کہا: وہ سال بھر میں صرف ایک بار ہوتی ہے، میں نے کہا: رسول اللہ صلی اللہ علیہ و آلہ وسلم نے ایسا نہیں فرمایا، پھر انہوں نے (تورات) کی تلاوت کی تو کہا: رسول اللہ صلی اللہ علیہ و آلہ وسلم نے سچ فرمایا، وہ ہر جمعہ میں ہوتی ہے۔ ابوہریرہ رضی اللہ عنہ کہتے ہیں: پھر میں عبداللہ بن سلام سے ملا اور انہیں کعب کے ساتھ اپنی مجلس کا حال بتایا، پھر راوی نے امام مالک کی حدیث کی طرح پوری روایت ذکر کی۔ [المستدرك على الصحيحين/كِتَابُ الْجُمُعَةِ/حدیث: 1044]