چونکہ قریش مانوس ہوئے ﴿۱﴾ (یعنی) جاڑے اور گرمی کے سفروں سے مانوس ﴿۲﴾ لہٰذا اُن کو چاہیے کہ اِس گھر کے رب کی عبادت کریں ﴿۳﴾ جس نے اُنہیں بھوک سے بچا کر کھانے کو دیا اور خوف سے بچا کر امن عطا کیا ﴿۴﴾
Translation: Tafheem-ul-Quran - Maududi
Since the Quraysh became accustomed, ﴿1﴾ accustomed to the journey of winter and summer, ﴿2﴾ therefore, let them worship the Lord of this House; ﴿3﴾ Who fed them against hunger, and secured them against fear. ﴿4﴾
ترجمہ: مولانا محمد جوناگڑھی
قریش کے مانوس کرنے کے لئے ﴿۱﴾ (یعنی) انہیں جاڑے اور گرمی کے سفر سے مانوس کرنے کے لئے۔ (اس کے شکریہ میں) ﴿۲﴾ پس انہیں چاہئے کہ اسی گھر کے رب کی عبادت کرتے رہیں ﴿۳﴾ جس نے انہیں بھوک میں کھانا دیا اور ڈر (اور خوف) میں امن (وامان) دیا ﴿۴﴾
ترجمہ: فتح محمد جالندھری
قریش کے مانوس کرنے کے سبب ﴿۱﴾ (یعنی) ان کو جاڑے اور گرمی کے سفر سے مانوس کرنے کے سبب ﴿۲﴾ لوگوں کو چاہیئے کہ (اس نعمت کے شکر میں) اس گھر کے مالک کی عبادت کریں ﴿۳﴾ جس نے ان کو بھوک میں کھانا کھلایا اور خوف سے امن بخشا ﴿۴﴾
ترجمہ: احمد رضا خان بریلوی
اس لیے کہ قریش کو میل دلایا ﴿۱﴾ ان کے جاڑے اور گرمی دونوں کے کوچ میں میل دلایا (رغبت دلائی) ﴿۲﴾ تو انہیں چاہیے اس گھر کے رب کی بندگی کریں، ﴿۳﴾ جس نے انہیں بھوک میں کھانا دیا، اور انہیں ایک بڑے خوف سے امان بخشا ﴿۴﴾
ترجمہ: علامہ محمد حسین نجفی
چونکہ (اللہ نے) قریش کو مانوس کر دیا۔ ﴿۱﴾ یعنی جاڑے اور گرمی کے تجارتی سفر سے مانوس کر دیا ہے۔ ﴿۲﴾ تو ان کو چاہیے کہ اس گھر (خانۂ کعبہ) کے پروردگار کی عبادت کریں۔ ﴿۳﴾ جس نے ان کو بھوک میں کھانے کو دیا اور خوف میں امن عطا کیا۔ ﴿۴﴾
تفسیر
تفہیم القرآنمولانا مودودیؒ
شروع اللہ کے نام سے جو بڑا مہربان اور نہایت رحم والا ہے چونکہ قریش مانوس ہوئے1 (یعنی) جاڑے اور گرمی کے سفروں سے مانوس،2 لہٰذا اُن کو چاہیے کہ اِس گھر کے ربّ کی عبادت کریں3 جس نے اُنہیں بھُوک سے بچا کر کھانے کو دیا4 اور خوف سے بچا کر امن عطا کیا۔5 ؏۱
Tafheem ul QuranSayyid Abul A'la Maududi
As the Quraish become accustomed.1 Accustomed to their journeys in the winter and the summer.2 So they should worship the Lord of this House.3 Who has fed them against hunger,4 and made them secure against fear.5
تفسیر ابن کثیرحافظ ابن کثیرؒ
آیات 1–4
امن و امان کی ضمانت ٭٭
موجودہ عثمانی قرآن کی ترتیب میں یہ سورت سورۃ الفیل سے علیحدہ ہے اور دونوں کے درمیان «بسم الله» کی آیت کا فاصلہ ہے، مضمون کے اعتبار سے یہ سورت پہلی سے ہی متعلق ہے جیسے کہ محمد بن اسحاق عبدالرحمن بن زید بن اسلم رحمہ اللہ وغیرہ نے تصریح کی ہے اس بنا پر معنی یہ ہوں گے کہ ہم نے مکہ سے ہاتھیوں کو روکا اور ہاتھی والوں کو ہلاک کیا۔ یہ قریشیوں کو الفت دلانے اور انہیں اجتماع کے ساتھ باامن اس شہر میں رہنے سہنے کے لیے تھا۔ اور یہ مراد بھی کی گئی ہے کہ یہ قریشی جاڑوں اور گرمیوں میں کیا دور دراز کے سفر امن و امان سے طے کر سکتے تھے کیونکہ مکہ جیسے محترم شہر میں رہنے کی وجہ سے ہر جگہ ان کی عزت ہوتی تھی بلکہ ان کے ساتھ بھی جو ہوتا تھا امن و امان سے سفر طے کر لیتا تھا اسی طرح وطن میں ہر طرح کا امن انہیں حاصل ہوتا تھا۔ جیسے اور جگہ قرآن کریم میں ہے «أَوَلَمْ يَرَوْا أَنَّا جَعَلْنَا حَرَمًا آمِنًا وَيُتَخَطَّفُ النَّاسُ مِنْ حَوْلِهِمْ» ۱؎ [29-العنكبوت:67] الخ یعنی ’ کیا یہ نہیں دیکھتے کہ ہم نے حرم کو امن والی جگہ بنا دیا ہے اس کے آس پاس تو لوگ اچک لیے جاتے ہیں ‘، لیکن یہاں کے رہنے والے نڈر ہیں۔ امام ابن جریر رحمہ اللہ فرماتے ہیں «لِإِيلَافِ» ، میں پہلا «لام» تعجب کا «لام» ہے اور دونوں سورتیں بالکل جداگانہ ہیں جیسا کہ مسلمانوں کا اجماع ہے۔ تو گویا یوں فرمایا جا رہا ہے کہ تم قریشیوں کے اس اجتماع اور الفت پر تعجب کرو کہ میں نے انہیں کیسی بھاری نعمت عطا فرما رکھی ہے انہیں چاہیئے کہ میری اس نعمت کا شکر اس طرح ادا کریں کہ صرف میری ہی عبادت کرتے رہیں۔ جیسے اور جگہ ہے «إِنَّمَا أُمِرْتُ أَنْ أَعْبُدَ رَبَّ هَـٰذِهِ الْبَلْدَةِ الَّذِي حَرَّمَهَا وَلَهُ كُلُّ شَيْءٍ وَأُمِرْتُ أَنْ أَكُونَ مِنَ الْمُسْلِمِينَ» ۱؎ [27-النمل:91] ، یعنی ’ اے نبی تم کہہ دو کہ مجھے تو صرف یہی حکم دیا گیا ہے کہ میں اس شہر کے رب کی عبادت کروں جس نے اسے حرم بنایا جو ہر چیز کا مالک ہے مجھے حکم دیا گیا ہے کہ میں اس کا مطیع اور فرمانبردار رہوں ‘۔
پھر فرماتا ہے وہ رب بیت جس نے انہیں بھوک میں کھلایا اور خوف میں نڈر رکھا انہیں چاہیئے کہ اس کی عبادت میں کسی چھوٹے بڑے کو شریک نہ ٹھہرائیں جو اللہ کے اس حکم کی بجا آوری کرے گا وہ تو دنیا کے اس امن کے ساتھ آخرت کے دن بھی امن و امان سے رہے گا، اور اس کی نافرمانی کرنے سے یہ امن بھی بےامنی ہے اور آخرت کا امن بھی ڈر خوف اور انتہائی مایوسی سے بدل جائے گا۔ جیسے اور جگہ فرمایا: «وَضَرَبَ اللَّـهُ مَثَلًا قَرْيَةً كَانَتْ آمِنَةً مُطْمَئِنَّةً يَأْتِيهَا رِزْقُهَا رَغَدًا مِنْ كُلِّ مَكَانٍ فَكَفَرَتْ بِأَنْعُمِ اللَّـهِ فَأَذَاقَهَا اللَّـهُ لِبَاسَ الْجُوعِ وَالْخَوْفِ بِمَا كَانُوا يَصْنَعُونَ» * «وَلَقَدْ جَاءَهُمْ رَسُولٌ مِنْهُمْ فَكَذَّبُوهُ فَأَخَذَهُمُ الْعَذَابُ وَهُمْ ظَالِمُونَ» ۱؎ [16-النحل:112-113] یعنی ’ اللہ تعالیٰ ان بستی والوں کی مثال بیان فرماتا ہے جو امن و اطمینان کے ساتھ تھے ہر جگہ سے بافراغت روزیاں کھچی چلی آتی تھیں لیکن انہیں اللہ کی ناشکری کرنے کی سوجھی چنانچہ اللہ تعالیٰ نے بھی انہیں بھوک اور خوف کا لباس چکھا دیا یہی ان کے کرتوت کا بدلہ تھا ان کے پاس ان ہی میں سے اللہ کے بھیجے ہوئے آئے لیکن انہوں نے انہیں جھٹلایا اس ظلم پر اللہ کے عذابوں نے انہیں گرفتار کر لیا ‘۔ ایک حدیث میں ہے { رسول اللہ صلی اللہ علیہ وسلم نے فرمایا: ”قریشیو! تمہیں تو اللہ یوں راحت و آرام پہنچائے گھر بیٹھے کھلائے پلائے چاروں طرف بدامنی کی آگ کے شعلے بھڑک رہے ہوں اور تمہیں امن و امان سے میٹھی نیند سلائے پھر تم پر کیا مصیبت ہے جو تم اپنے اس پروردگار کی توحید سے جی چراؤ اور اس کی عبادت میں دل نہ لگاؤ بلکہ اس کے سوا دو سروں کے آگے سر جھکاؤ“} ۱؎۔ [مسند احمد:460/6:اسناد ضعیف] «الْحَمْدُ لِلَّـه» سورۃ قريش کی تفسیر ختم ہوئی۔