Sunan Daraqutni

سیدنا ابومحذورہ رضی اللہ عنہ بیان کرتے ہیں: میں دس نوجوانوں کے ہمراہ نبی کریم صلی اللہ علیہ و آلہ وسلم کے ساتھ حنین کے لیے روانہ ہوا۔ اس وقت آپ ہمارے نزدیک سب سے زیادہ ناپسندیدہ شخصیت تھے۔ ہم اٹھ کر اذان دینے لگے، ہم ان کا مذاق اڑا رہے تھے۔ نبی کریم صلی اللہ علیہ و آلہ وسلم نے فرمایا: ”ان نوجوانوں کو میرے پاس لاؤ۔“ پھر آپ نے فرمایا: ”تم لوگ اذان دو!“ ان لوگوں نے اذان دی۔ آپ نے فرمایا: ”ہاں! یہ وہ شخص ہے جس کی میں نے اذان سنی تھی۔ تم جاؤ اور اہل مکہ کے لیے اذان دیا کرو۔ تم عتاب سے کہو کہ نبی کریم صلی اللہ علیہ و آلہ وسلم نے یہ حکم دیا ہے کہ میں اہل مکہ کے لیے اذان دوں۔“ پھر آپ نے میری پیشانی پر ہاتھ پھیرا اور فرمایا: ”یہ کہو: اللہ اکبر اللہ اکبر اللہ اکبر اللہ اکبر، اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ۔“ یہ کلمات دو مرتبہ ہیں۔ ”اشھد ان لا الہ الا اللہ، اشھد ان لا الہ الا اللہ، اشھد ان محمدا رسول اللہ، اشھد ان محمدا رسول اللہ، حی علی الصلوٰۃ، حی علی الصلوٰۃ، حی علی الفلاح، حی علی الفلاح، اللہ اکبر اللہ اکبر، لا الہ الا اللہ۔“ جب تم صبح کی پہلی اذان دو تو یہ کہو: ”الصلوٰۃ خیر من النوم، الصلوٰۃ خیر من النوم۔“ جب تم اقامت کہو تو ان کلمات کو دو مرتبہ کہو: ”قد قامت الصلوٰۃ، قد قامت الصلوٰۃ۔“ کیا تم نے یہ بات سن لی؟ راوی بیان کرتے ہیں: سیدنا ابومحذورہ رضی اللہ عنہ اپنی پیشانی کے بال نہیں کٹواتے تھے اور وہاں مانگ نہیں نکالتے تھے کیونکہ نبی کریم صلی اللہ علیہ و آلہ وسلم نے اس پر ہاتھ پھیرا تھا۔ [سنن الدارقطني/ كِتَابُ الصَّلَاةِ/حدیث: 904]