سیدنا عوف بن مالک رضی اللہ عنہ بیان کرتے ہیں: ایک رات نبی اکرم صلی اللہ علیہ و آلہ وسلم نے ہمارے ساتھ پڑاؤ کیا، ہر شخص نے اپنی سواری کو بٹھا دیا۔ رات کے کسی حصے میں، میں بیدار ہوا تو نبی اکرم صلی اللہ علیہ و آلہ وسلم کی اونٹنی کے آگے کوئی موجود نہیں تھا (یعنی نبی اکرم صلی اللہ علیہ و آلہ وسلم موجود نہیں تھے) میں نبی اکرم صلی اللہ علیہ و آلہ وسلم کو تلاش کرنے کے لیے چل پڑا، تو سیدنا معاذ بن جبل اور سیدنا عبداللہ بن قیس رضی اللہ عنہما بھی کھڑے نظر آئے، میں نے دریافت کیا: اللہ کے رسول کہاں ہیں؟ انہوں نے جواب دیا: ہمیں نہیں معلوم البتہ ہم نے وادی کے بالائی حصے کی طرف سے ایک آواز سنی ہے جو چکی کے چلنے جیسی آواز ہے۔ راوی کہتے ہیں، تھوڑی ہی دیر بعد نبی اکرم صلی اللہ علیہ و آلہ وسلم ہمارے پاس تشریف لے آئے۔ آپ صلی اللہ علیہ و آلہ وسلم نے فرمایا: ”میرے پروردگار کی طرف سے ایک قاصد میرے پاس آیا۔ اس نے مجھے اس بات کا اختیار دیا، یا تو میری امت کا نصف حصہ جنت میں داخل ہو جائے یا پھر میں شفاعت کروں (خواہ وہ کتنے ہی لوگوں کی کیوں نہ ہو) تو میں نے شفاعت کو اختیار کر لیا۔“ ہم نے عرض کی: یا رسول اللہ صلی اللہ علیہ و آلہ وسلم ! ہم آپ صلی اللہ علیہ و آلہ وسلم کو اللہ کا اور اپنے ساتھ کا واسطہ دے کر یہ کہتے ہیں: آپ صلی اللہ علیہ و آلہ وسلم ہمیں بھی ان لوگوں میں شامل کریں، جنہیں آپ صلی اللہ علیہ و آلہ وسلم کی شفاعت نصیب ہو گی۔ نبی اکرم صلی اللہ علیہ و آلہ وسلم نے فرمایا: ”تم ان لوگوں میں شامل ہو جن کو میری شفاعت نصیب ہو گی۔“ راوی کہتے ہیں: پھر ہم لوگ لوگوں کی طرف آئے تو وہ گھبرائے ہوئے تھے۔ انہوں نے نبی اکرم صلی اللہ علیہ و آلہ وسلم کو غیر موجود پایا تھا۔ نبی اکرم صلی اللہ علیہ و آلہ وسلم نے ارشاد فرمایا: ”میرے پاس اس رات (میرے پروردگار کا) قاصد آیا، تو اس نے مجھے اس بات کا اختیار دیا کہ یا تو میری امت کا نصف حصہ جنت میں داخل ہو جائے یا میں شفاعت کو اختیار کروں، تو میں نے شفاعت کو اختیار کیا۔“ لوگوں نے عرض کی: ہم آپ صلی اللہ علیہ و آلہ وسلم کو اللہ کا واسطہ دے کر یہ کہتے ہیں: آپ صلی اللہ علیہ و آلہ وسلم ہمیں بھی ان لوگوں میں شامل کیجیے، جن کو آپ صلی اللہ علیہ و آلہ وسلم کی شفاعت نصیب ہو گی۔ نبی اکرم صلی اللہ علیہ و آلہ وسلم نے ارشاد فرمایا: ”میں تمام حاضرین کو اس بات کا گواہ بنا کر کہتا ہوں کہ میری شفاعت میری امت کے ہر اس شخص کو نصیب ہو گی جو ایسی حالت میں فوت ہوتا ہے کہ وہ کسی کو اللہ کا شریک نہ ٹھہراتا ہو۔“ [صحیح ابن حبان/كِتَابُ التَّارِيخِ/حدیث: 6470]