سیدنا ثوبان رضی اللہ عنہ نبی اکرم صلی اللہ علیہ و آلہ وسلم کا یہ فرمان نقل کرتے ہیں: ”میں اپنے حوض کے پاس کھڑا ہو کر کچھ لوگوں کو اس سے دور کروں گا، میں ان لوگوں کو اپنے عصا کے ذریعے ماروں گا تاکہ وہ لوگ پیچھے ہٹ جائیں۔“ راوی بیان کرتے ہیں: نبی اکرم صلی اللہ علیہ و آلہ وسلم سے اس حوض کی وسعت کے بارے میں دریافت کیا گیا، تو آپ صلی اللہ علیہ و آلہ وسلم نے ارشاد فرمایا: ”وہ میری (اس) جگہ سے لے کر عمان جتنا ہے، ان دونوں کے درمیان ایک ماہ کا یا اس سے قریب کا فاصلہ ہے۔“ نبی اکرم صلی اللہ علیہ و آلہ وسلم سے اس حوض کے مشروب کے بارے میں دریافت کیا گیا، تو آپ صلی اللہ علیہ و آلہ وسلم نے ارشاد فرمایا: ”وہ دودھ سے زیادہ سفید اور شہد سے زیادہ میٹھا ہو گا، اس میں دو پرنالے ہوں گے جن میں جنت سے پانی آئے گا، ان میں سے ایک موتی کا بنا ہوا ہو گا اور دوسرا سونے کا ہو گا۔“ [صحیح ابن حبان/كِتَابُ التَّارِيخِ/حدیث: 6455]