سیدنا عقبہ بن عامر رضی اللہ عنہ بیان کرتے ہیں کہ ایک دن ہم نے نبی اکرم صلی اللہ علیہ و آلہ وسلم کی اقتداء میں نماز ادا کی۔ نبی اکرم صلی اللہ علیہ و آلہ وسلم نے طویل قیام کیا، حالانکہ آپ صلی اللہ علیہ و آلہ وسلم جب ہمیں نماز پڑھاتے تھے تو مختصر پڑھاتے تھے۔ ہم نے آپ صلی اللہ علیہ و آلہ وسلم کو صرف یہ کہتے ہوئے سنا: «أَيْ رَبِّ، وَأَنَا فِيهِمْ؟» ”اے میرے پروردگار! میں بھی ان میں ہوں؟“ پھر ہم نے آپ صلی اللہ علیہ و آلہ وسلم کو دیکھا کہ آپ صلی اللہ علیہ و آلہ وسلم نے کوئی چیز پکڑنے کے لیے اپنا دستِ مبارک آگے بڑھایا، پھر آپ صلی اللہ علیہ و آلہ وسلم رکوع میں چلے گئے۔ اس کے بعد آپ صلی اللہ علیہ و آلہ وسلم نے تیزی سے نماز ادا کی۔ جب نبی اکرم صلی اللہ علیہ و آلہ وسلم نے سلام پھیر لیا تو آپ صلی اللہ علیہ و آلہ وسلم تشریف فرما ہوئے، ہم بھی آپ صلی اللہ علیہ و آلہ وسلم کے اردگرد بیٹھ گئے۔ نبی اکرم صلی اللہ علیہ و آلہ وسلم نے فرمایا: ”مجھے اس بات کا اندازہ ہے کہ میری نماز اور قیام کی طوالت نے تمہیں گھبراہٹ کا شکار کیا ہے۔“ ہم نے عرض کی: جی ہاں، یا رسول اللہ صلی اللہ علیہ و آلہ وسلم ! ہم نے آپ صلی اللہ علیہ و آلہ وسلم کو یہ کہتے ہوئے سنا تھا کہ «أَيْ رَبِّ، وَأَنَا فِيهِمْ؟» ”اے میرے پروردگار! میں ان میں موجود ہوں۔“ نبی اکرم صلی اللہ علیہ و آلہ وسلم نے فرمایا: ”اس ذات کی قسم! جس کے دستِ قدرت میں میری جان ہے، آخرت کے حوالے سے تمہارے ساتھ جس بھی چیز کا وعدہ کیا گیا ہے وہ ابھی میرے اس جگہ قیام کے دوران میرے سامنے پیش کی گئی ہے، یہاں تک کہ جہنم میرے سامنے پیش کی گئی، اس کا کچھ حصہ میری طرف آیا، یہاں تک کہ میری اس جگہ کے قریب ہو گیا، تو مجھے یہ اندیشہ ہوا کہ کہیں وہ تمہیں اپنی لپیٹ میں نہ لے، تو میں نے عرض کی: «أَيْ رَبِّ، وَأَنَا فِيهِمْ؟» ”اے میرے پروردگار! میں ان لوگوں میں موجود ہوں۔“ اللہ تعالیٰ نے اسے تم لوگوں سے پھیر دیا، پھر اس کے ٹکڑے مڑ گئے، جیسے وہ غالیچے ہوں، میں نے اس کی طرف دیکھا تو بنو غفار سے تعلق رکھنے والا عمرو بن حرثان جہنم میں اپنی کمان سے ٹیک لگائے ہوئے تھا۔ اور جہنم میں ایک حمیری عورت بھی تھی جو بلی کی مالکن تھی، اس نے بلی کو باندھ دیا تھا، اور وہ اسے کھانے کے لیے کچھ دیتی بھی نہیں تھی اور اسے چھوڑتی بھی نہیں تھی۔“ [صحیح ابن حبان/كِتَابُ التَّارِيخِ/حدیث: 6432]