سیدنا مقدام بن معدیکرب رضی اللہ عنہ، نبی اکرم صلی اللہ علیہ و آلہ وسلم کا یہ فرمان نقل کرتے ہیں: ”مجھے کتاب عطا کی گئی ہے اور وہ چیز (عطا کی گئی ہے) جو اس کے برابر ہے۔ عنقریب ایسا وقت آئے گا، جب ایک سیر (بھرے ہوئے پیٹ والا) شخص اپنے تکیے کے ساتھ ٹیک لگا کر یہ کہے گا: میرے اور تم لوگوں کے درمیان یہ کتاب (یعنی قرآن مجید) موجود ہے، جو چیز اس میں حلال ہو گی، ہم اسے حلال قرار دیں گے اور جو چیز اس میں حرام ہو گی، ہم اسے حرام قرار دیں گے۔ (نبی اکرم صلی اللہ علیہ و آلہ وسلم نے فرمایا) خبردار! ایسا نہیں ہے۔“ [صحیح ابن حبان/المُقَدِّمَةُ/حدیث: 12]

سیدنا ابورافع رضی اللہ عنہ روایت کرتے ہیں کہ نبی اکرم صلی اللہ علیہ و آلہ وسلم نے ارشاد فرمایا: ”میں کسی ایسے شخص کو نہ پاؤں جس کے پاس میرے احکام میں سے کوئی حکم آئے جس کے بارے میں میں نے کرنے کا حکم دیا ہو یا جسے کرنے سے میں نے منع کیا ہو، اور وہ شخص یہ کہے: ہمیں نہیں معلوم یہ کیا چیز ہے؟ ہمارے پاس اللہ کی کتاب موجود ہے، یہ حکم اس میں تو نہیں ہے۔“ [صحیح ابن حبان/المُقَدِّمَةُ/حدیث: 13]