سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ و آلہ وسلم جب خطبہ دیتے تھے تو آپ صلی اللہ علیہ و آلہ وسلم کی آنکھیں سرخ ہو جاتی تھیں، آپ صلی اللہ علیہ و آلہ وسلم کی آواز بلند ہو جاتی تھی اور آپ صلی اللہ علیہ و آلہ وسلم کا جوش زیادہ ہو جاتا تھا، یہاں تک کہ یوں لگتا تھا جیسے آپ کسی لشکر (کے حملے) سے ڈرا رہے ہیں۔ آپ صلی اللہ علیہ و آلہ وسلم یہ فرماتے تھے: ”وہ صبح یا شام کے وقت (تم پر حملہ کر دے گا)۔“ آپ صلی اللہ علیہ و آلہ وسلم یہ فرماتے تھے: ”مجھے اور قیامت کو ان دو کی طرح مبعوث کیا گیا ہے۔“ آپ اپنی شہادت کی انگلی اور درمیان والی انگلی کے درمیان فرق کرتے تھے اور آپ صلی اللہ علیہ و آلہ وسلم یہ ارشاد فرماتے تھے: «أَمَّا بَعْدُ» ”امابعد! سب سے بہترین کلام اللہ کی کتاب ہے اور سب سے بہترین ہدایت سیدنا محمد صلی اللہ علیہ و آلہ وسلم (کی لائی ہوئی) ہدایت ہے، بے شک سب سے برا کام نیا پیدا شدہ کام ہے اور ہر بدعت گمراہی ہے۔“ نبی اکرم صلی اللہ علیہ و آلہ وسلم یہ ارشاد فرماتے تھے: ”میں ہر مومن کے نزدیک اس کی جان سے زیادہ قریب ہوں، جو شخص مال چھوڑ کر جائے گا وہ اس کے اہل خانہ کو ملے گا اور جو شخص قرض یا بال بچے چھوڑ کر جائے گا تو وہ میری طرف آئیں گے اور ان کی ادائیگی میرے ذمہ ہو گی۔“ [صحیح ابن حبان/المُقَدِّمَةُ/حدیث: 10]