اُم المؤمنین سیدہ عائشہ رضی اللہ عنہا سے روایت ہے کہ رسول اللہ صلی اللہ علیہ و آلہ وسلم کفن دیئے گئے تین سفید کپڑوں میں جو سحول کے بنے ہوئے تھے، نہ ان میں قمیص تھا نہ عمامہ۔ [موطا امام مالك رواية يحييٰ/كِتَابُ الْجَنَائِزِ/حدیث: 522]

حضرت یحییٰ بن سعید سے روایت ہے کہ رسول اللہ صلی اللہ علیہ و آلہ وسلم کفن دیئے گئے تین سفید کپڑوں میں جو سحول کے بنے ہوئے تھے۔ [موطا امام مالك رواية يحييٰ/كِتَابُ الْجَنَائِزِ/حدیث: 523]

حضرت یحییٰ بن سعید نے کہا: مجھے پہنچا کہ سیدنا ابوبکر صدیق رضی اللہ عنہ نے سیدہ عائشہ صدیقہ رضی اللہ عنہا سے کہا اپنی بیماری میں: رسول اللہ صلی اللہ علیہ و آلہ وسلم کتنے کپڑوں میں کفن دیئے گئے تھے؟ کہا سیدہ عائشہ رضی اللہ عنہا نے: تین سفید کپڑوں میں سحول کے۔ تب سیدنا ابوبکر صدیق رضی اللہ عنہ نے کہا: یہ کپڑا جو میں پہنے ہوں اس میں گیرو یا زعفران لگا ہوا تھا، اس کو دھو کر اور وہ کپڑے لے کر مجھے کفن دے دینا۔ سیدہ عائشہ رضی اللہ عنہا بولیں: یہ کیا بات ہے (کیا اور کپڑے نہیں ہیں)؟ سیدنا ابوبکر رضی اللہ عنہ بولے: مردے سے زیادہ زندے کو کپڑے کی حاجت ہے، کفن تو پیپ اور خون کے لیے ہے۔ [موطا امام مالك رواية يحييٰ/كِتَابُ الْجَنَائِزِ/حدیث: 524]

سیدنا عمرو بن عاص رضی اللہ عنہ سے روایت ہے کہ مردہ قمیص پہنایا جائے، اور تہبند پہنایا جائے، پھر تیسرے کپڑے میں لپیٹ دیا جائے، اگر ایک ہی کپڑا ہو تو اسی میں کفن دیا جائے۔ [موطا امام مالك رواية يحييٰ/كِتَابُ الْجَنَائِزِ/حدیث: 525]