اس شخص سے روایت ہے کہ جس نے نماز پڑھی رسول اللہ صلی اللہ علیہ و آلہ وسلم کے ساتھ غزوۂ ذات الرقاع میں خوف کی، کہ رسول اللہ صلی اللہ علیہ و آلہ وسلم کے ساتھ کچھ لوگ کھڑے ہوئے نماز کو اور کچھ لوگ دشمن کے سامنے رہے، تو پہلے آپ صلی اللہ علیہ و آلہ وسلم نے ایک رکعت پڑھی اُن لوگوں کے ساتھ، پھر آپ صلی اللہ علیہ وآلہ وسلم کھڑے رہے اور وہ لوگ اپنی نماز پوری کر کے چلے گئے، اور جو لوگ دشمن کے سامنے تھے وہ آئے، اُن کے ساتھ آپ صلی اللہ علیہ وآلہ وسلم نے ایک رکعت پڑھی، پھر آپ صلی اللہ علیہ وآلہ وسلم بیٹھے رہے اور اُن لوگوں نے ایک رکعت اور پڑھی، جب آپ صلی اللہ علیہ وآلہ وسلم نے اُن کے ساتھ سلام پھیرا۔ [موطا امام مالك رواية يحييٰ/كِتَابُ صَلَاةِ الْخَوْفِ/حدیث: 440]

سیدنا سہل بن ابی حثمہ رضی اللہ تعالیٰ عنہ سے روایت ہے کہ انہوں نے کہا: نماز خوف کی اس طرح پر ہے کہ امام کچھ لوگوں کو اپنے ساتھ نماز کو کھڑا کرے اور کچھ لوگ دشمن کے سامنے رہیں، تو امام ایک رکعت پڑھے اور سجدہ کرے، جب سجدہ سے کھڑا ہو تو امام کھڑا رہے اور مقتدی اپنی ایک رکعت جو باقی ہے پڑھ کر سلام پھیر کر چلے جائیں دشمن کے سامنے، اور دشمن کے سامنے جو لوگ تھے وہ آ کرتکبیرِ تحریمہ کہہ کر امام کے ساتھ شریک ہوں تو امام رکوع اور سجدہ سے فارغ ہو کر سلام پھیر دے، اور لوگ کھڑے ہو کر ایک رکعت پڑھ کر سلام پھیریں۔ [موطا امام مالك رواية يحييٰ/كِتَابُ صَلَاةِ الْخَوْفِ/حدیث: 441]

نافع سے روایت ہے کہ سیدنا عبداللہ بن عمر رضی اللہ تعالیٰ عنہما سے جب سوال ہوتا نمازِ خوف کا، کہتے امام آگے بڑھے نماز کو اور کچھ لوگ اس کے پیچھے ہوں تو اُن کے ساتھ امام ایک رکعت پڑھائے اور کچھ لوگ دشمن کے سامنے ہوں، تو جب وہ لوگ جو امام کے پیچھے تھے ایک رکعت پڑھ چکیں، دشمن کے سامنے چلے جائیں، اور سلام نہ پھیریں، اور وہ لوگ چلے آئیں جنہوں نے نماز نہیں شروع کی، اب وہ لوگ امام کے پیچھے ایک رکعت پڑھیں، پھر امام سلام پھیر دے اور باری باری ہر ہر گروہ کے لوگ آکر ایک ایک رکعت اور پڑھ کر نماز اپنی تمام کریں تاکہ ہر ایک گروہ کی دو دو رکعتیں ہو جائیں اور اگر خوف بہت سخت ہو تو کھڑے کھڑے پیادے نماز پڑھ لیں اور اشارے سے، اور سوار سواری پر، اگرچہ ان کا منہ قبلہ کی طرف نہ ہو۔
امام مالک رحمہ اللہ نے فرمایا: نافع نے کہا کہ سیدنا عبداللہ بن عمر رضی اللہ تعالیٰ عنہما نے یہ حدیث رسول اللہ صلی اللہ علیہ و آلہ وسلم سے سنی ہوگی۔ [موطا امام مالك رواية يحييٰ/كِتَابُ صَلَاةِ الْخَوْفِ/حدیث: 442]

سعید بن مسیب سے روایت ہے کہ رسول اللہ صلی اللہ علیہ و آلہ وسلم نے ظہر اور عصر کی نماز نہیں پڑھی جنگِ خندق میں، یہاں تک کہ ڈوب گیا آفتاب۔ [موطا امام مالك رواية يحييٰ/كِتَابُ صَلَاةِ الْخَوْفِ/حدیث: 443]