نبی کریم صلی اللہ علیہ و آلہ وسلم کے ایک اور صحابی سے اسی طرح کی روایت مروی ہے کہ آپ صلی اللہ علیہ و آلہ وسلم نے فرمایا: ”عمار (کے رگ و ریشے اور) ہڈیوں کے جوڑوں تک ایمان بھرا ہوا ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5785]

محمد بن علی ابن الحنفیہ سیدنا عمار بن یاسر رضی اللہ عنہ سے روایت کرتے ہیں کہ وہ رسول اللہ صلی اللہ علیہ و آلہ وسلم کی خدمت میں حاضر ہوئے جبکہ آپ صلی اللہ علیہ و آلہ وسلم کو بخار کی شدت تھی، تو رسول اللہ صلی اللہ علیہ و آلہ وسلم نے ان سے فرمایا: ”کیا میں تمہیں وہ دعا نہ سکھاؤں جو جبریل (علیہ السلام) نے مجھے دم کرنے کے لیے سکھائی تھی؟“ میں نے عرض کیا: کیوں نہیں اے اللہ کے رسول! چنانچہ آپ صلی اللہ علیہ و آلہ وسلم نے انہیں یہ دعا سکھائی: «بِاسْمِ اللَّهِ أَرْقِيكَ، وَاللَّهُ يَشْفِيكَ، مِنْ كُلِّ دَاءٍ يُؤْذِيكَ. خُذْهَا فَلْتَهْنِيكَ» ”اللہ کے نام سے میں تم پر دم کرتا ہوں، اور اللہ تمہیں ہر اس بیماری سے شفا دے گا جو تمہیں تکلیف پہنچاتی ہے، اسے لے لو یہ تمہارے لیے خوشگوار (باعثِ شفا) ہو“۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5786]

سیدنا عمار بن یاسر رضی اللہ عنہ سے روایت ہے، انہوں نے کہا: میں نے نبی کریم صلی اللہ علیہ و آلہ وسلم کو (اس حال میں) دیکھا کہ آپ صلی اللہ علیہ و آلہ وسلم کے ساتھ (اسلام کے ابتدائی دور میں) صرف پانچ غلام، دو عورتیں اور سیدنا ابوبکر (رضی اللہ عنہم) تھے۔
یہ حدیث شیخین کی شرط پر صحیح ہے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5787]