سیدنا ابن عمر رضی اللہ عنہما سے روایت ہے کہ رسول اللہ صلی اللہ علیہ و آلہ وسلم جب جنگِ احد سے واپس تشریف لائے تو آپ صلی اللہ علیہ و آلہ وسلم نے بنو عبد الاشہل کی عورتوں کے رونے کی آواز سنی جو اپنے مقتولین پر رو رہی تھیں، تو آپ صلی اللہ علیہ و آلہ وسلم نے فرمایا: ”لیکن حمزہ کے لیے تو کوئی رونے والی نہیں ہے۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4952]

عروہ سے روایت ہے کہ جنگِ بدر میں شریک ہونے والوں میں رسول اللہ صلی اللہ علیہ و آلہ وسلم اور حمزہ بن عبدالمطلب شامل تھے، اور حمزہ جنگِ احد میں شہید ہوئے جبکہ ان کی عمر چون سال تھی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4953]

سیدنا جابر رضی اللہ عنہ سے روایت ہے کہ جب رسول اللہ صلی اللہ علیہ و آلہ وسلم نے سیدنا حمزہ کے جسدِ مبارک سے کپڑا ہٹایا تو آپ صلی اللہ علیہ و آلہ وسلم رو پڑے، اور جب آپ صلی اللہ علیہ و آلہ وسلم نے ان کے جسم کا یہ حال (مثلہ کیا ہوا) دیکھا تو آپ صلی اللہ علیہ و آلہ وسلم کی ہچکی بندھ گئی۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4954]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ و آلہ وسلم نے جنگِ احد کے دن سیدنا حمزہ کو اس حال میں دیکھا کہ وہ شہید کیے جا چکے تھے اور ان کے جسم کا مثلہ کیا گیا تھا، آپ صلی اللہ علیہ و آلہ وسلم نے ایسا دردناک منظر دیکھا کہ اس سے پہلے کبھی آپ صلی اللہ علیہ و آلہ وسلم کے دل کو اتنا دکھ اور صدمہ نہیں پہنچا تھا، آپ صلی اللہ علیہ و آلہ وسلم نے فرمایا: ”تم پر اللہ کی رحمت ہو، تم صلہ رحمی کرنے والے اور بہت زیادہ نیک کام کرنے والے تھے، اگر تمہارے بعد والوں کے غم کا ڈر نہ ہوتا تو مجھے یہ بات خوش کرتی کہ میں تمہیں اسی طرح چھوڑ دیتا یہاں تک کہ تمہیں پرندوں اور درندوں کے پیٹ سے اٹھایا جاتا“، پھر آپ صلی اللہ علیہ و آلہ وسلم نے اسی جگہ کھڑے ہو کر قسم کھائی: ”اللہ کی قسم! میں تمہارے بدلے ان کے ستر آدمیوں کا اسی طرح مثلہ کروں گا“، پس آپ صلی اللہ علیہ و آلہ وسلم ابھی وہیں کھڑے تھے کہ قرآن کی یہ آیت نازل ہوئی: ﴿وَإِنْ عَاقَبْتُمْ فَعَاقِبُوا بِمِثْلِ مَا عُوقِبْتُمْ بِهِ وَلَئِنْ صَبَرْتُمْ لَهُوَ خَيْرٌ لِلصَّابِرِينَ﴾ [سورة النحل: 126] یہاں تک کہ سورت ختم ہوئی، چنانچہ رسول اللہ صلی اللہ علیہ و آلہ وسلم نے اپنی قسم کا کفارہ ادا کیا اور اس ارادے سے رک گئے۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4955]