سیدنا ابوہریرہ رضی اللہ عنہ سے روایت ہے، انہوں نے کہا: ہم رسول اللہ صلی اللہ علیہ و آلہ وسلم کے ساتھ عشاء کی نماز پڑھ رہے تھے، آپ صلی اللہ علیہ و آلہ وسلم جب سجدہ کرتے تو حسن اور حسین (رضی اللہ عنہما) آپ صلی اللہ علیہ و آلہ وسلم کی پشت پر سوار ہو جاتے، جب آپ صلی اللہ علیہ و آلہ وسلم سر اٹھاتے تو انہیں نہایت نرمی کے ساتھ پکڑ کر نیچے بٹھا دیتے، جب آپ صلی اللہ علیہ و آلہ وسلم دوبارہ سجدے میں جاتے تو وہ بھی دوبارہ پشت پر آ جاتے، جب آپ صلی اللہ علیہ و آلہ وسلم نماز سے فارغ ہوئے تو ایک کو اپنے ایک طرف اور دوسرے کو دوسری طرف بٹھا دیا، میں نے حاضر ہو کر عرض کیا: اے اللہ کے رسول صلی اللہ علیہ و آلہ وسلم ! کیا میں انہیں ان کی والدہ کے پاس چھوڑ آؤں؟ آپ صلی اللہ علیہ و آلہ وسلم نے فرمایا: ”نہیں“، اتنے میں بجلی چمکی تو آپ صلی اللہ علیہ و آلہ وسلم نے فرمایا: ”اپنی والدہ کے پاس چلے جاؤ“، پس وہ دونوں اس بجلی کی روشنی میں چلتے رہے یہاں تک کہ گھر میں داخل ہو گئے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4838]