سیدنا جابر بن عبداللہ رضی اللہ عنہ سے روایت ہے کہ جب خندق کھودی جا رہی تھی تو میں نے رسول اللہ صلی اللہ علیہ و آلہ وسلم کے شکم مبارک پر بھوک کی وجہ سے شدید سکڑاؤ (گڑھے) دیکھے، میں تیزی سے اپنی اہلیہ کے پاس پہنچا اور کہا: میں نے رسول اللہ صلی اللہ علیہ و آلہ وسلم کو انتہائی سخت بھوک کی حالت میں دیکھا ہے، میری اہلیہ نے ایک تھیلی نکالی جس میں ایک صاع جو تھے اور ہمارے پاس گھر میں پلا ہوا ایک چھوٹا بکری کا بچہ تھا، میں نے اسے ذبح کیا اور آٹا پیسا، پھر میں رسول اللہ صلی اللہ علیہ و آلہ وسلم کے پاس حاضر ہوا اور آپ کے کان میں چپکے سے عرض کی: اے اللہ کے رسول! ہم نے اپنا ایک چھوٹا جانور ذبح کیا ہے اور ہمارے پاس جو ایک صاع جو تھا اسے پیس لیا ہے، لہٰذا آپ اور چند افراد ساتھ تشریف لائیں، اس پر رسول اللہ صلی اللہ علیہ و آلہ وسلم نے بلند آواز سے پکارا: ”اے اہل خندق! جابر نے کھانے کی دعوت تیار کی ہے، لہٰذا تم سب جلدی آ جاؤ“، پھر آپ صلی اللہ علیہ و آلہ وسلم نے مجھ سے فرمایا: ”جب تک میں نہ آ جاؤں، نہ تو اپنی ہانڈی چولہے سے اتارنا اور نہ ہی آٹے کی روٹیاں پکانا“، میں گھر پہنچا اور رسول اللہ صلی اللہ علیہ و آلہ وسلم بھی تشریف لائے، لوگ (گروہ در گروہ) آنے لگے یہاں تک کہ میں اپنی اہلیہ کے پاس گیا، انہوں نے گوندھا ہوا آٹا نکال کر آپ صلی اللہ علیہ و آلہ وسلم کے سامنے رکھا، آپ صلی اللہ علیہ و آلہ وسلم نے اس میں اپنا لعابِ دہن ڈالا اور برکت کی دعا فرمائی، پھر فرمایا: ”کسی روٹی پکانے والی کو بلا لو تاکہ وہ تمہارے ساتھ روٹیاں پکائے اور اپنی ہانڈی سے سالن نکالتے رہو مگر اسے چولہے سے نیچے نہ اتارنا“، جبکہ صحابہ کی تعداد ایک ہزار تھی، جابر رضی اللہ عنہ اللہ کی قسم کھا کر کہتے ہیں کہ ان سب نے پیٹ بھر کر کھانا کھایا یہاں تک کہ وہ کھانا چھوڑ کر واپس چلے گئے، جبکہ ہماری ہانڈی اسی طرح (سالن سے بھری) جوش مار رہی تھی اور ہمارا آٹا اسی طرح (باقی) تھا کہ اس سے روٹیاں پکائی جا رہی تھیں۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4370]