یعلیٰ بن مرہ اپنے والد سے روایت کرتے ہیں، انہوں نے کہا: میں نے رسول اللہ صلی اللہ علیہ و آلہ وسلم کے ساتھ سفر کیا تو میں نے آپ صلی اللہ علیہ و آلہ وسلم سے ایک نہایت عجیب معاملہ دیکھا؛ ہم نے ایک جگہ قیام کیا تو آپ صلی اللہ علیہ و آلہ وسلم نے فرمایا: ”ان دو درختوں کے پاس جاؤ اور کہو کہ رسول اللہ صلی اللہ علیہ و آلہ وسلم تمہیں حکم دیتے ہیں کہ تم دونوں آپس میں مل جاؤ“، میں گیا اور انہیں یہ بات کہی، تو ان میں سے ہر ایک اپنی جڑ سے اکھڑ گیا اور ایک دوسرے کی طرف چل پڑے یہاں تک کہ دونوں آپس میں مل گئے، پھر رسول اللہ صلی اللہ علیہ و آلہ وسلم نے ان کے پیچھے اپنی حاجت پوری کی، پھر آپ صلی اللہ علیہ و آلہ وسلم نے فرمایا: ”جاؤ اور ان سے کہو کہ ہر ایک اپنی جگہ واپس چلا جائے“، میں نے ان کے پاس جا کر یہ بات کہی تو ہر ایک اپنی جگہ واپس چلا گیا۔ پھر آپ صلی اللہ علیہ و آلہ وسلم کے پاس ایک عورت آئی اور کہنے لگی: میرا یہ بیٹا ہے جسے سات سال سے جنون (مرگی) کا دورہ پڑتا ہے اور اسے ہر روز دو بار دورہ آتا ہے، تو رسول اللہ صلی اللہ علیہ و آلہ وسلم نے فرمایا: ”اسے میرے قریب کرو“، اس نے اسے قریب کیا تو آپ صلی اللہ علیہ و آلہ وسلم نے اس کے منہ میں اپنا لعابِ دہن ڈالا اور فرمایا: «اخْرُجْ عَدُوَّ اللَّهِ أَنَا رَسُولُ اللَّهِ» ”اے اللہ کے دشمن نکل جا، میں اللہ کا رسول ہوں“، پھر رسول اللہ صلی اللہ علیہ و آلہ وسلم نے اس عورت سے فرمایا: ”جب ہم واپس آئیں تو ہمیں بتانا کہ اس نے کیا کیا“، جب رسول اللہ صلی اللہ علیہ و آلہ وسلم واپس لوٹے تو وہ عورت آپ سے ملی، اس کے ساتھ دو مینڈھے، کچھ پنیر اور گھی تھا، رسول اللہ صلی اللہ علیہ و آلہ وسلم نے مجھ سے فرمایا: ”یہ مینڈھا پکڑ لو اور اس سے جو تم چاہو تیار کر لو“، اس عورت نے کہا: اس ذات کی قسم جس نے آپ کو عزت بخشی! جب سے آپ ہم سے جدا ہوئے ہیں ہم نے اس (بچے) میں کوئی بیماری نہیں دیکھی۔ پھر آپ صلی اللہ علیہ و آلہ وسلم کے پاس ایک اونٹ آیا اور آپ کے سامنے کھڑا ہو گیا، آپ صلی اللہ علیہ و آلہ وسلم نے دیکھا کہ اس کی آنکھوں سے آنسو بہہ رہے تھے، آپ صلی اللہ علیہ و آلہ وسلم نے اس کے مالکوں کو بلایا اور فرمایا: ”تمہارا یہ اونٹ تمہاری کیا شکایت کر رہا ہے؟“ انہوں نے عرض کیا: ہم اس پر کام لیتے تھے، اب جب یہ بوڑھا ہو گیا اور اس کی کام کرنے کی سکت ختم ہو گئی تو ہم نے فیصلہ کیا ہے کہ کل اسے ذبح کر دیں، رسول اللہ صلی اللہ علیہ و آلہ وسلم نے فرمایا: ”اسے ذبح نہ کرو بلکہ اسے اونٹوں میں چھوڑ دو تاکہ یہ ان کے ساتھ رہے“۔
یہ حدیث صحیح الاسناد ہے لیکن شیخین نے اسے اس سیاق کے ساتھ روایت نہیں کیا۔ [المستدرك على الصحيحين/كِتَابِ: آيَاتِ رَسُولِ اللهِ صَلَّى اللهُ عَلَيْهِ وَسَلَّمَ الَّتِي فِي دَلَائِلِ النُّبُوَّةِ/حدیث: 4278]

سیدنا سمرہ بن جندب رضی اللہ عنہ سے روایت ہے کہ رسول اللہ صلی اللہ علیہ و آلہ وسلم کے پاس ایک بڑا پیالہ تھا جس سے لوگ کھانا کھاتے تھے، جب ایک گروہ سیر ہو جاتا تو اس کی جگہ دوسرے لوگ بیٹھ جاتے، راوی کہتے ہیں کہ یہ سلسلہ ظہر کی نماز کے وقت تک اسی طرح چلتا رہا، تو ایک شخص نے دریافت کیا کہ کیا اس پیالے کو نیچے سے کسی چیز کے ذریعے بڑھایا جا رہا تھا؟ تو سمرہ رضی اللہ عنہ نے فرمایا: اسے صرف آسمان سے ہی غیبی مدد دی جا رہی تھی۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كِتَابِ: آيَاتِ رَسُولِ اللهِ صَلَّى اللهُ عَلَيْهِ وَسَلَّمَ الَّتِي فِي دَلَائِلِ النُّبُوَّةِ/حدیث: 4279]