Mustadrak al-Hakim

عبداللہ بن قیس سے روایت ہے، انہوں نے کہا: میں ابوبردہ کے پاس مقدمات (فیصلے کے لیے) لے جایا کرتا تھا۔ ایک روز میں ان کے پاس تھا کہ حارث بن اقیش رضی اللہ عنہ ان کے پاس تشریف لائے، اور انہیں (نبی صلی اللہ علیہ و آلہ وسلم کی) صحبت کا شرف حاصل تھا۔ انہوں نے اس رات نبی کریم صلی اللہ علیہ و آلہ وسلم کی یہ حدیث بیان کی کہ آپ صلی اللہ علیہ و آلہ وسلم نے فرمایا: ”کوئی سے دو مسلمان ایسے نہیں جن کے چار بچے فوت ہو جائیں، مگر اللہ اپنی رحمت کے فضل سے ان دونوں کو جنت میں داخل فرمائے گا۔“ ہم نے عرض کی: اے اللہ کے رسول! اور اگر تین ہوں تو؟ آپ صلی اللہ علیہ و آلہ وسلم نے فرمایا: ”اگر تین ہوں تب بھی۔“ ہم نے عرض کی: اے اللہ کے رسول! اور اگر دو ہوں تو؟ آپ صلی اللہ علیہ و آلہ وسلم نے فرمایا: ”اگر دو ہوں تب بھی۔“ پھر آپ صلی اللہ علیہ و آلہ وسلم نے فرمایا: ”بلاشبہ میری امت میں سے کسی (نافرمان) کو جہنم کے لیے اتنا بڑا کر دیا جائے گا کہ وہ اس کے کونوں میں سے ایک کونا بن جائے گا، اور بلاشبہ میری امت میں سے ایک شخص ایسا بھی ہوگا جس کی شفاعت سے قبیلہ مضر کی تعداد سے بھی زیادہ لوگ جنت میں داخل ہوں گے۔“
اس حدیث کی سند امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8967]