Mustadrak al-Hakim

سیدنا انس بن مالک رضی اللہ عنہ سے روایت ہے، انہوں نے کہا: ایک مرتبہ رسول اللہ صلی اللہ علیہ و آلہ وسلم تشریف فرما تھے کہ ہم نے دیکھا آپ صلی اللہ علیہ و آلہ وسلم اس طرح مسکرائے کہ آپ کے سامنے کے دانت مبارک ظاہر ہو گئے، تو سیدنا عمر رضی اللہ عنہ نے عرض کیا: اے اللہ کے رسول! میرے ماں باپ آپ پر قربان ہوں، کس بات نے آپ کو ہنسایا؟ آپ صلی اللہ علیہ و آلہ وسلم نے فرمایا: ”میری امت کے دو شخص رب العزت کے سامنے گھٹنوں کے بل گرے ہوئے تھے، ان میں سے ایک نے عرض کیا: اے میرے رب! اپنے اس بھائی سے میرا حق (مظلمہ) دلا دے، تو اللہ عزوجل نے مطالبہ کرنے والے سے فرمایا: تم اپنے بھائی کے ساتھ کیا کرو گے جبکہ اس کی نیکیوں میں سے اب کچھ بھی باقی نہیں رہا؟ اس نے عرض کیا: اے میرے رب! پھر یہ میرے گناہوں کا بوجھ اٹھا لے“، (یہ بیان کرتے ہوئے) رسول اللہ صلی اللہ علیہ و آلہ وسلم کی آنکھوں سے آنسو جاری ہو گئے، پھر فرمایا: ”بے شک وہ دن بہت عظیم ہوگا، لوگ اس بات کے محتاج ہوں گے کہ ان کے گناہوں کا بوجھ بانٹ لیا جائے، پھر اللہ نے مطالبہ کرنے والے سے فرمایا: اپنی نگاہ اٹھاؤ اور ان جنتوں کی طرف دیکھو، اس نے اپنا سر اٹھایا اور عرض کیا: اے میرے رب! میں سونے کے شہر اور سونے کے ایسے محلات دیکھ رہا ہوں جو موتیوں سے جڑے ہوئے ہیں، یہ کس نبی، کس صدیق یا کس شہید کے لیے ہیں؟ اللہ نے فرمایا: یہ اس کے لیے ہے جو اس کی قیمت ادا کرے، اس نے عرض کیا: اے میرے رب! اس کی قیمت کا کون مالک ہو سکتا ہے؟ اللہ نے فرمایا: تم اس کے مالک بن سکتے ہو، اس نے پوچھا: کس طرح؟ فرمایا: اپنے بھائی کو معاف کرنے کے ذریعے، اس نے عرض کیا: اے میرے رب! میں نے اسے معاف کر دیا، تب اللہ عزوجل نے فرمایا: اپنے بھائی کا ہاتھ پکڑو اور اسے جنت میں لے جاؤ“، اس وقت رسول اللہ صلی اللہ علیہ و آلہ وسلم نے فرمایا: ”اللہ سے ڈرو اور اپنے باہمی معاملات درست کرو، کیونکہ اللہ تعالیٰ مسلمانوں کے درمیان صلح کراتا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْأَهْوَالِ/حدیث: 8933]