Mustadrak al-Hakim

سیدہ شفاء بنت عبداللہ رضی اللہ عنہا سے روایت ہے، انہوں نے فرمایا: میں ایک دن رسول اللہ صلی اللہ علیہ و آلہ وسلم کی خدمت میں حاضر ہوئی، آپ صلی اللہ علیہ و آلہ وسلم سے کسی چیز کا سوال کیا اور اپنی تنگیِ حالات کی شکایت کی، تو آپ صلی اللہ علیہ و آلہ وسلم میرے سامنے معذرت پیش کرنے لگے اور میں آپ صلی اللہ علیہ و آلہ وسلم پر (محبت و اپنائیت کی بنا پر) تھوڑا گلہ کرنے لگی، انہوں نے بیان کیا کہ پھر ظہر کی نماز کا وقت ہو گیا تو میں اپنی بیٹی کے گھر چلی گئی جو شرجیل بن حسنہ کے نکاح میں تھیں، میں نے ان کے شوہر کو گھر میں پایا تو میں ان پر بھی گلہ کرنے لگی اور کہا کہ نماز کا وقت ہو گیا ہے اور تم ابھی تک گھر بیٹھے ہو؟ انہوں نے کہا: اے خالہ! مجھ پر گلہ نہ کیجیے، میرے پاس صرف دو ہی کپڑے تھے جن میں سے ایک نبی کریم صلی اللہ علیہ و آلہ وسلم نے (پہننے کے لیے) عاریتاً منگوا لیا ہے، (شفاء کہتی ہیں) یہ سن کر میں نے خود سے کہا کہ میں آپ صلی اللہ علیہ و آلہ وسلم پر گلہ کر رہی ہوں جبکہ آپ صلی اللہ علیہ و آلہ وسلم کی (ایثار و فقر کی) یہ حالت ہے کہ آپ کے پاس پہننے کو اپنا کپڑا تک نہیں! شرجیل نے بتایا کہ ان دو کپڑوں میں سے بھی ایک میں پیوند لگا ہوا تھا جسے ہم نے خود جوڑا تھا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 7066]