Mustadrak al-Hakim

سیدنا سعید بن مسیب سے روایت ہے کہ سیدنا عمر بن خطاب رضی اللہ عنہ کی صاحبزادی سیدہ حفصہ رضی اللہ عنہا اپنے شوہر کی وفات سے بیوہ ہو گئیں، اور سیدنا عثمان رضی اللہ عنہ کی زوجہ سیدہ رقیہ رضی اللہ عنہا وفات پا گئیں، تو سیدنا عمر رضی اللہ عنہ کا گزر سیدنا عثمان رضی اللہ عنہ کے پاس سے ہوا تو انہوں نے پوچھا: ”کیا تمہیں حفصہ سے نکاح میں دلچسپی ہے؟“ مگر انہوں نے کوئی جواب نہ دیا، تو سیدنا عمر رضی اللہ عنہ نبی کریم صلی اللہ علیہ و آلہ وسلم کی خدمت میں حاضر ہوئے اور عرض کی: ”کیا آپ نے عثمان کو نہیں دیکھا؟ میں نے ان کے سامنے حفصہ کی پیشکش کی تو انہوں نے مجھ سے اعراض کیا اور کوئی جواب نہیں دیا۔“ تو نبی کریم صلی اللہ علیہ و آلہ وسلم نے فرمایا: ”اس سے بہتر صورت ہو گی، میں حفصہ سے نکاح کروں گا اور عثمان کا نکاح ام کلثوم سے کر دوں گا۔“ چنانچہ نبی کریم صلی اللہ علیہ و آلہ وسلم نے سیدہ حفصہ رضی اللہ عنہا سے نکاح فرما لیا اور سیدنا عثمان رضی اللہ عنہ کا نکاح رسول اللہ صلی اللہ علیہ و آلہ وسلم کی صاحبزادی سیدہ ام کلثوم رضی اللہ عنہا سے کر دیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6900]