Mustadrak al-Hakim

حکیم بن معاویہ بن حیدہ اپنے والد سے روایت کرتے ہیں کہ انہوں نے اپنے بھائی مالک بن حیدہ سے کہا: تم ہمیں رسول اللہ صلی اللہ علیہ و آلہ وسلم کے پاس لے چلو کیونکہ وہ تمہیں جانتے ہیں اور مجھے نہیں جانتے، آپ صلی اللہ علیہ و آلہ وسلم نے میرے کچھ پڑوسیوں کو (کسی وجہ سے) روک لیا ہے، چنانچہ وہ دونوں آپ صلی اللہ علیہ و آلہ وسلم کی خدمت میں حاضر ہوئے اور مالک بن حیدہ نے عرض کیا: اے اللہ کے رسول! میں اسلام لا چکا ہوں اور میرے پڑوسی بھی مسلمان ہو گئے ہیں، لہٰذا انہیں چھوڑ دیں، آپ صلی اللہ علیہ و آلہ وسلم نے کوئی جواب نہ دیا، انہوں نے دوبارہ عرض کیا تو بھی جواب نہ ملا، وہ غصے میں کھڑے ہوئے اور کہنے لگے: اگر آپ ایسا کریں گے تو لوگ یہی کہیں گے کہ آپ ایک کام کی دعوت دیتے ہیں اور خود اس کے برعکس کرتے ہیں، (معاویہ کہتے ہیں) میں انہیں ڈانٹنے اور منع کرنے لگا، آپ صلی اللہ علیہ و آلہ وسلم نے پوچھا: ”یہ کیا کہہ رہا ہے؟“ لوگوں نے بتایا کہ وہ اس طرح کی باتیں کر رہا ہے، تو آپ صلی اللہ علیہ و آلہ وسلم نے فرمایا: ”اگر میں نے ایسا کیا تو اس کا وبال مجھ پر ہوگا، ان پر اس سے کوئی اثر نہیں پڑے گا، ان کے پڑوسیوں کو ان کے لیے چھوڑ دو۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6853]