Mustadrak al-Hakim

سیدنا عبداللہ بن عباس رضی اللہ عنہما سے روایت ہے، انہوں نے کہا: جب رسول اللہ صلی اللہ علیہ و آلہ وسلم کی وفات ہوئی تو میں نے ایک انصاری شخص سے کہا: اے فلاں! آؤ ہم (علم) تلاش کریں کیونکہ آج رسول اللہ صلی اللہ علیہ و آلہ وسلم کے اصحاب (کثرت سے) زندہ ہیں، اس نے کہا: عجب بات ہے اے ابن عباس! کیا آپ سمجھتے ہیں کہ لوگ آپ کے محتاج ہوں گے جبکہ لوگوں میں رسول اللہ صلی اللہ علیہ و آلہ وسلم کے وہ (بڑے) صحابہ موجود ہیں جو موجود ہیں؟! (ابن عباس رضی اللہ عنہما کہتے ہیں:) میں نے اسے چھوڑ دیا اور خود (علم کی) تلاش میں لگ گیا، اگر مجھے کسی صحابی کے متعلق پتا چلتا کہ انہوں نے رسول اللہ صلی اللہ علیہ و آلہ وسلم سے کوئی حدیث سنی ہے تو میں ان کے دروازے پر جا پہنچتا اور (ان کے آرام کے پیشِ نظر دستک نہ دیتا بلکہ) وہاں بیٹھ جاتا، ہوا میرے چہرے پر مٹی اڑاتی رہتی یہاں تک کہ وہ باہر تشریف لاتے اور مجھے دیکھ کر کہتے: اے رسول اللہ صلی اللہ علیہ و آلہ وسلم کے چچا زاد! آپ کیسے تشریف لائے؟ آپ کی کیا حاجت ہے؟ میں عرض کرتا: ایک حدیث مجھے معلوم ہوئی ہے جو آپ رسول اللہ صلی اللہ علیہ و آلہ وسلم سے روایت کرتے ہیں، وہ کہتے: ”آپ نے مجھے پیغام کیوں نہ بھیج دیا (میں خود حاضر ہو جاتا)؟“ تو میں کہتا: ”میں اس بات کا زیادہ حقدار ہوں کہ آپ کے پاس خود آؤں۔“ ابن عباس رضی اللہ عنہما کہتے ہیں: وہ انصاری شخص زندہ رہا یہاں تک کہ اس نے دیکھا کہ لوگ میرے گرد (علم کے لیے) جمع ہو رہے ہیں، تو اس نے کہا: یہ نوجوان مجھ سے زیادہ عقل مند تھا۔
یہ حدیث امام بخاری کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 6427]