Mustadrak al-Hakim

علی بن عیسیٰ نوفلی سے روایت ہے کہ جب سیدنا نوفل بن الحارث رضی اللہ عنہ غزوہ بدر میں قیدی بنے تو رسول اللہ صلی اللہ علیہ و آلہ وسلم نے ان سے فرمایا: ”اے نوفل! اپنا فدیہ دے کر جان چھڑاؤ“، انہوں نے عرض کیا: اے اللہ کے رسول! میرے پاس فدیہ دینے کے لیے کچھ نہیں ہے، آپ صلی اللہ علیہ و آلہ وسلم نے فرمایا: ”اپنے ان نیزوں کے ذریعے فدیہ دو جو مقامِ جدہ میں رکھے ہوئے ہیں“، (یہ سن کر) انہوں نے کہا: میں گواہی دیتا ہوں کہ آپ یقیناً اللہ کے رسول ہیں (کیونکہ نیزوں کا علم وحی کے بغیر ممکن نہ تھا)۔ چنانچہ انہوں نے انہی کے ذریعے اپنا فدیہ ادا کیا اور وہ ایک ہزار نیزے تھے۔ راوی کہتے ہیں کہ رسول اللہ صلی اللہ علیہ و آلہ وسلم نے نوفل اور عباس بن عبدالمطلب کے درمیان بھائی چارہ قائم فرمایا تھا، اور وہ دونوں دورِ جاہلیت میں بھی ایک دوسرے کے شریکِ تجارت، مال میں برابر کے حصہ دار اور باہمی محبت رکھنے والے تھے۔ نوفل رضی اللہ عنہ رسول اللہ صلی اللہ علیہ و آلہ وسلم کے ہمراہ فتح مکہ، حنین اور طائف میں شریک ہوئے اور غزوہ حنین میں وہ رسول اللہ صلی اللہ علیہ و آلہ وسلم کے ساتھ ثابت قدم رہے، تب رسول اللہ صلی اللہ علیہ و آلہ وسلم نے فرمایا تھا: ”گویا میں دیکھ رہا ہوں کہ تمہارے نیزے مشرکین کی پیٹھوں کو توڑ رہے ہیں۔“ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 5151]