Mustadrak al-Hakim

سیدنا جابر بن عبداللہ رضی اللہ عنہما سے روایت ہے، انہوں نے کہا: رسول اللہ صلی اللہ علیہ و آلہ وسلم نے غزوہِ احد کے دن جب لوگ قتال سے واپس آئے تو حمزہ کو موجود نہ پایا، راوی کہتے ہیں کہ ایک شخص نے بتایا: ”میں نے انہیں اس درخت کے پاس دیکھا تھا جبکہ وہ کہہ رہے تھے: میں اللہ کا شیر اور اس کے رسول کا شیر ہوں، اے اللہ! میں تیرے حضور اس چیز سے براءت کا اظہار کرتا ہوں جو یہ لائے ہیں - یعنی ابوسفیان اور اس کے ساتھی - اور ان (مسلمانوں) کے کیے اور ان کے فرار ہونے پر تیرے حضور معذرت خواہ ہوں“، پس رسول اللہ صلی اللہ علیہ و آلہ وسلم ان کی طرف چلے، جب آپ صلی اللہ علیہ و آلہ وسلم نے ان کی پیشانی دیکھی تو رو پڑے اور جب ان کا مثلہ (اعضاء کٹنا) دیکھا تو آپ صلی اللہ علیہ و آلہ وسلم کی ہچکی بندھ گئی، پھر آپ صلی اللہ علیہ و آلہ وسلم نے دریافت فرمایا: ”کیا ان کے لیے کفن نہیں ہے؟“ تو انصار کے ایک شخص نے ایک کپڑا ان پر ڈال دیا، جابر کہتے ہیں کہ رسول اللہ صلی اللہ علیہ و آلہ وسلم نے فرمایا: ”قیامت کے دن اللہ تعالیٰ کے ہاں تمام شہداء کے سردار حمزہ ہوں گے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4961]