Mustadrak al-Hakim

سیدنا اسامہ بن زید رضی اللہ عنہما سے روایت ہے، انہوں نے کہا کہ رسول اللہ صلی اللہ علیہ و آلہ وسلم سیدنا حمزہ کے گھر جانے کے ارادے سے نکلے، میں بھی آپ صلی اللہ علیہ و آلہ وسلم کے پیچھے چل پڑا یہاں تک کہ آپ صلی اللہ علیہ و آلہ وسلم دروازے پر رک گئے اور فرمایا: ”السلام علیکم، کیا ابو عمارہ گھر پر ہیں؟“ راوی کہتے ہیں: تو ان کی زوجہ نے عرض کیا: ”نہیں اللہ کی قسم! میرے ماں باپ آپ پر قربان ہوں، وہ آپ ہی کی طرف نکلے ہیں، میرا خیال ہے کہ وہ بنو نجار کی کسی گلی میں آپ کو نہ مل سکے، اے اللہ کے رسول! میرے ماں باپ آپ پر قربان، کیا آپ اندر تشریف نہیں لائیں گے؟“ آپ صلی اللہ علیہ و آلہ وسلم نے دریافت فرمایا: ”کیا تمہارے پاس کھانے کو کچھ ہے؟“ انہوں نے عرض کیا: ”جی ہاں“، پس آپ صلی اللہ علیہ و آلہ وسلم اندر تشریف لے گئے اور انہوں نے آپ صلی اللہ علیہ و آلہ وسلم کے سامنے «قَعْب» ”لکڑی کا پیالہ“ پیش کیا جس میں «حَيْس» ”کھجور، گھی اور پنیر کا حلوہ“ تھا، انہوں نے عرض کیا: ”اے اللہ کے رسول! میرے ماں باپ آپ پر قربان، اسے کھائیے، یہ آپ کے لیے خوشگوار اور ہضم ہونے والا ہو، آپ تشریف لائے ہیں جبکہ میں خود آپ کے پاس آ کر مبارکباد دینا چاہتی تھی، کیونکہ مجھے ابو عمارہ نے بتایا ہے کہ آپ کو جنت میں ایک نہر عطا کی گئی ہے جسے الکوثر کہا جاتا ہے“، تو رسول اللہ صلی اللہ علیہ و آلہ وسلم نے فرمایا: ”اور اس کے (پینے کے) برتنوں کی تعداد آسمان کے ستاروں سے بھی زیادہ ہے، اور وہاں میرے پاس پہنچنے والوں میں سب سے زیادہ محبوب تمہاری قوم کے لوگ ہیں۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4947]