Mustadrak al-Hakim

سیدنا بریدہ رضی اللہ عنہ سے روایت ہے کہ ابوذر اور ان کے چچا زاد بھائی نعیم کے ہمراہ میں رسول اللہ صلی اللہ علیہ و آلہ وسلم کی تلاش میں نکلا، اس وقت آپ صلی اللہ علیہ و آلہ وسلم ایک پہاڑ میں روپوش تھے، تو ابوذر رضی اللہ عنہ نے عرض کیا: اے محمد ( صلی اللہ علیہ و آلہ وسلم )! ہم آپ کے پاس آپ کی باتیں سننے اور آپ کی دعوت جاننے کے لیے آئے ہیں، تو رسول اللہ صلی اللہ علیہ و آلہ وسلم نے فرمایا: ”میں گواہی دیتا ہوں کہ اللہ کے سوا کوئی معبود نہیں اور میں اللہ کا رسول ہوں۔“ چنانچہ ابوذر اور ان کے ساتھی ایمان لے آئے اور میں بھی ایمان لے آیا، اس وقت سیدنا علی رضی اللہ عنہ رسول اللہ صلی اللہ علیہ و آلہ وسلم کے کسی کام سے باہر گئے ہوئے تھے، رسول اللہ صلی اللہ علیہ و آلہ وسلم پر وحی پیر کے دن نازل ہوئی اور سیدنا علی رضی اللہ عنہ نے منگل کے دن نماز پڑھی۔
اس حدیث کی سند صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4637]