Mustadrak al-Hakim

سیدنا عمران بن حصین رضی اللہ عنہ سے روایت ہے کہ رسول اللہ صلی اللہ علیہ و آلہ وسلم نے ایک لشکر روانہ فرمایا اور سیدنا علی بن ابی طالب رضی اللہ عنہ کو ان کا امیر مقرر کیا، سیدنا علی رضی اللہ عنہ اس مہم پر روانہ ہوئے اور انہوں نے (مالِ غنیمت میں سے) ایک لونڈی حاصل کی، جس پر صحابہ نے ان سے اختلاف کیا اور رسول اللہ صلی اللہ علیہ و آلہ وسلم کے چار صحابہ نے باہم یہ عہد کیا کہ جب ہم رسول اللہ صلی اللہ علیہ و آلہ وسلم سے ملیں گے تو آپ کو اس بارے میں بتائیں گے جو علی رضی اللہ عنہ نے کیا ہے۔ سیدنا عمران رضی اللہ عنہ فرماتے ہیں کہ مسلمانوں کا یہ دستور تھا کہ جب وہ سفر سے واپس آتے تو پہلے رسول اللہ صلی اللہ علیہ و آلہ وسلم کی خدمت میں حاضر ہو کر آپ صلی اللہ علیہ و آلہ وسلم کو سلام کرتے پھر اپنے ٹھکانوں کو جاتے، چنانچہ جب یہ لشکر واپس آیا تو انہوں نے رسول اللہ صلی اللہ علیہ و آلہ وسلم کو سلام کیا، پھر ان چاروں میں سے پہلا شخص کھڑا ہوا اور عرض کیا: اے اللہ کے رسول! کیا آپ نے نہیں دیکھا کہ علی نے ایسا اور ایسا کیا ہے؟ تو آپ صلی اللہ علیہ و آلہ وسلم نے اس سے اعراض فرمایا، پھر دوسرا کھڑا ہوا اور اس نے بھی یہی بات کہی تو آپ صلی اللہ علیہ و آلہ وسلم نے اس سے بھی اعراض فرمایا، پھر تیسرا کھڑا ہوا اور اس نے بھی وہی بات کہی تو آپ صلی اللہ علیہ و آلہ وسلم نے اس سے بھی اعراض فرمایا، پھر جب چوتھا شخص کھڑا ہوا اور اس نے بھی یہی بات کہی تو رسول اللہ صلی اللہ علیہ و آلہ وسلم اس کی طرف متوجہ ہوئے جبکہ آپ صلی اللہ علیہ و آلہ وسلم کے چہرہ مبارک پر غصے کے آثار تھے، آپ صلی اللہ علیہ و آلہ وسلم نے فرمایا: ”تم لوگ علی کے بارے میں کیا چاہتے ہو؟ «إِنَّ عَلِيًّا مِنِّي وَأَنَا مِنْهُ، وَوَلِيُّ كُلِّ مُؤْمِنٍ» بے شک علی مجھ سے ہے اور میں اس سے ہوں، اور وہ ہر مومن کا ولی (سرپرست و دوست) ہے۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ مَعْرِفَةِ الصَّحَابَةِ رَضِيَ اللهُ تَعَالَى عَنْهُمْ/حدیث: 4630]