Mustadrak al-Hakim

شرحبیل بن سعد سے روایت ہے، انہوں نے کہا: عبداللہ بن ابی سرح کے متعلق یہ آیت نازل ہوئی: ﴿وَمَنْ أَظْلَمُ مِمَّنِ افْتَرَى عَلَى اللَّهِ كَذِبًا أَوْ قَالَ أُوحِيَ إِلَيَّ وَلَمْ يُوحَ إِلَيْهِ شَيْءٌ وَمَنْ قَالَ سَأُنْزِلُ مِثْلَ مَا أَنْزَلَ اللَّهُ﴾ ”اور اس شخص سے بڑا ظالم کون ہوگا جو اللہ پر جھوٹ بہتان باندھے یا یہ کہے کہ میری طرف وحی کی گئی ہے حالانکہ اس کی طرف کچھ بھی وحی نہ کی گئی ہو، اور جو یہ کہے کہ میں بھی ویسا ہی کلام نازل کر دوں گا جیسا اللہ نے نازل کیا ہے“ [سورة الأنعام: 93] ، پھر جب رسول اللہ صلی اللہ علیہ و آلہ وسلم مکہ میں داخل ہوئے تو وہ سیدنا عثمان بن عفان رضی اللہ عنہ کی طرف بھاگ گیا، وہ ان کے رضاعی بھائی تھے، انہوں نے اسے اپنے پاس چھپائے رکھا یہاں تک کہ اہل مکہ کو اطمینان ہو گیا، پھر وہ اسے رسول اللہ صلی اللہ علیہ و آلہ وسلم کے پاس لے آئے اور انہوں نے امان طلب کی۔
امام حاکم فرماتے ہیں: دونوں کتابوں (بخاری و مسلم) میں یہ روایت صحیح ثابت ہے کہ رسول اللہ صلی اللہ علیہ و آلہ وسلم نے مکہ میں داخل ہونے سے پہلے عبداللہ بن سعد اور عبداللہ بن خطل کو قتل کرنے کا حکم دیا تھا، پس جو شخص امیر المؤمنین عثمان بن عفان رضی اللہ عنہ کی شہادت اور مصر میں عبداللہ بن سعد کی ان کے خلاف کی گئی زیادتیوں پر نظر ڈالے گا یہاں تک کہ ان کا جو انجام ہوا سو ہوا، وہ جان لے گا کہ نبی کریم صلی اللہ علیہ و آلہ وسلم ان (کے شر) سے سب سے زیادہ واقف تھے۔ [المستدرك على الصحيحين/كِتَابُ الْمَغَازِي وَالسَّرَايَا/حدیث: 4410]