Mustadrak al-Hakim

سیدنا انس بن مالک رضی اللہ عنہ سے روایت ہے، انہوں نے کہا: ہم رسول اللہ صلی اللہ علیہ و آلہ وسلم کے ساتھ ایک سفر میں تھے، ہم نے ایک جگہ پڑاؤ کیا تو اچانک وادی میں ایک شخص یہ کہہ رہا تھا: «اللَّهُمَّ اجْعَلْنِي مِنْ أُمَّةِ مُحَمَّدٍ الْمَرْحُومَةِ الْمَغْفُورَةِ الْمُثَابِ لَهَا» ”اے اللہ! مجھے محمد ( صلی اللہ علیہ و آلہ وسلم ) کی اس امت میں شامل فرما جس پر رحم کیا گیا، جس کی بخشش کر دی گئی اور جسے ثواب عطا کیا گیا ہے“، انس رضی اللہ عنہ کہتے ہیں کہ میں نے وادی میں جھانک کر دیکھا تو وہاں ایک شخص تھا جس کا قد تین سو ذراع سے بھی زیادہ تھا، اس نے مجھ سے پوچھا: تم کون ہو؟ میں نے کہا: انس بن مالک، رسول اللہ صلی اللہ علیہ و آلہ وسلم کا خادم، اس نے پوچھا: وہ کہاں ہیں؟ میں نے کہا: وہ یہاں موجود آپ کی بات سن رہے ہیں، اس نے کہا: ان کے پاس جائیے اور انہیں میرا سلام کہیے اور کہیے کہ آپ کا بھائی الیاس (علیہ السلام) آپ کو سلام کہتا ہے، پس میں نبی کریم صلی اللہ علیہ و آلہ وسلم کے پاس آیا اور آپ کو خبر دی، تو آپ صلی اللہ علیہ و آلہ وسلم تشریف لائے یہاں تک کہ ان سے ملاقات کی، ان سے معانقہ کیا اور انہیں سلام کیا، پھر دونوں بیٹھ کر باتیں کرنے لگے، الیاس علیہ السلام نے آپ صلی اللہ علیہ و آلہ وسلم سے کہا: اے اللہ کے رسول! میں سال میں صرف ایک ہی دن کھاتا ہوں اور آج میرا افطار کا دن ہے، لہذا میں اور آپ مل کر کھاتے ہیں، پس ان دونوں پر آسمان سے ایک دسترخوان اترا جس پر روٹی، مچھلی اور اجوائن (کرفس) تھی، انہوں نے کھایا اور مجھے بھی کھلایا، پھر ان دونوں نے عصر کی نماز ادا کی، اس کے بعد الیاس علیہ السلام نے آپ صلی اللہ علیہ و آلہ وسلم کو الوداع کہا، پھر میں نے دیکھا کہ وہ بادلوں پر سوار ہو کر آسمان کی طرف چلے گئے۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابِ: آيَاتِ رَسُولِ اللهِ صَلَّى اللهُ عَلَيْهِ وَسَلَّمَ الَّتِي فِي دَلَائِلِ النُّبُوَّةِ/حدیث: 4277]