Mustadrak al-Hakim

سیدنا عبداللہ بن عباس رضی اللہ عنہما سے روایت ہے کہ نبی کریم صلی اللہ علیہ و آلہ وسلم نے فرمایا: ”سیدنا آدم علیہ السلام کی عمر مبارک ایک ہزار سال تھی۔“ سیدنا ابن عباس رضی اللہ عنہما نے فرمایا کہ آدم اور نوح علیہما السلام کے درمیان ایک ہزار سال کا فاصلہ تھا، نوح اور ابراہیم علیہما السلام کے درمیان ایک ہزار سال کا، ابراہیم اور موسیٰ علیہما السلام کے درمیان سات سو سال کا، موسیٰ اور عیسیٰ علیہما السلام کے درمیان پانچ سو سال کا اور عیسیٰ علیہ السلام اور محمد صلی اللہ علیہ و آلہ وسلم کے درمیان چھ سو سال کا فاصلہ تھا۔
امام حاکم فرماتے ہیں کہ میں اس سے قبل رسول اللہ صلی اللہ علیہ و آلہ وسلم سے مروی صحیح روایت پیش کر چکا ہوں کہ آپ صلی اللہ علیہ و آلہ وسلم اور عیسیٰ علیہ السلام کے درمیان کوئی نبی نہیں ہے، البتہ خالد بن سنان اور ان کی صاحبزادی کے متعلق اخبار مروی ہیں جو رسول اللہ صلی اللہ علیہ و آلہ وسلم کی خدمت میں حاضر ہوئیں تو آپ صلی اللہ علیہ و آلہ وسلم نے فرمایا: ”اے میری بھتیجی! (خالد بن سنان) ایسے نبی تھے جنہیں ان کی قوم نے ضائع کر دیا۔“ [المستدرك على الصحيحين/كِتَابُ: تَوَارِيخِ الْمُتَقَدِّمِينَ مِنَ الْأَنْبِيَاءِ وَالْمُرْسَلِينَ/حدیث: 4217]