Mustadrak al-Hakim

ام المومنین سیدہ سودہ رضی اللہ عنہا سے روایت ہے کہ رسول اللہ صلی اللہ علیہ و آلہ وسلم نے فرمایا: ”لوگ (قیامت کے دن) ننگے پاؤں، ننگے بدن اور بغیر ختنہ کیے اٹھائے جائیں گے، پسینہ ان کے منہ تک لگام کی طرح پہنچ جائے گا اور کانوں کی لو تک پہنچ جائے گا“، سیدہ سودہ رضی اللہ عنہا کہتی ہیں کہ میں نے عرض کی: اے اللہ کے رسول! ہائے افسوس، کیا ہم ایک دوسرے کی طرف دیکھیں گے؟ آپ صلی اللہ علیہ و آلہ وسلم نے فرمایا: ”لوگ اس وقت اس (دیکھنے) سے بے نیاز اور (اپنی فکر میں) مشغول ہوں گے“، پھر رسول اللہ صلی اللہ علیہ و آلہ وسلم نے یہ آیات تلاوت فرمائیں: ﴿يَوْمَ يَفِرُّ الْمَرْءُ مِنْ أَخِيهِ (34) وَأُمِّهِ وَأَبِيهِ (35) وَصَاحِبَتِهِ وَبَنِيهِ (36) لِكُلِّ امْرِئٍ مِنْهُمْ يَوْمَئِذٍ شَأْنٌ يُغْنِيهِ﴾ [سورة عبس: 34-37] ”جس دن آدمی اپنے بھائی سے بھاگے گا، اور اپنی ماں اور اپنے باپ سے، اور اپنی بیوی اور اپنے بیٹوں سے، اس دن ان میں سے ہر شخص کی ایسی حالت ہوگی جو اسے (دوسروں سے) بے پروا کر دے گی۔“
یہ حدیث امام مسلم کی شرط پر صحیح ہے لیکن انہوں نے اس لفظ کے ساتھ اسے روایت نہیں کیا، بلکہ شیخین نے حاتم بن ابی صغیرہ کی روایت سے عائشہ رضی اللہ عنہا سے اسے مختصراً روایت کرنے پر اتفاق کیا ہے۔ [المستدرك على الصحيحين/كِتَابُ التَّفْسِيرِ/حدیث: 3942]