مستدرک الحاکم

سیدنا عبداللہ بن عباس رضی اللہ عنہما سے روایت ہے کہ ابوطالب بیمار ہوئے تو قریش کے لوگ (عیادت کے لیے) آئے، نبی کریم صلی اللہ علیہ و آلہ وسلم بھی تشریف لائے تو ابوطالب کے سرہانے ایک شخص کے بیٹھنے کی جگہ تھی، ابوجہل (جلدی سے) وہاں بیٹھ گیا تاکہ آپ صلی اللہ علیہ و آلہ وسلم کو وہاں بیٹھنے سے روک دے، پھر ان لوگوں نے ابوطالب سے آپ صلی اللہ علیہ و آلہ وسلم کی شکایت کی، ابوطالب نے کہا: اے بھتیجے! آپ اپنی قوم سے کیا چاہتے ہیں؟ آپ صلی اللہ علیہ و آلہ وسلم نے فرمایا: ”اے چچا! میں ان سے صرف ایک ایسا کلمہ چاہتا ہوں جس کی بدولت عرب ان کے تابع ہو جائیں اور عجم انہیں جزیہ ادا کریں“، انہوں نے پوچھا: کیا صرف ایک کلمہ؟ آپ صلی اللہ علیہ و آلہ وسلم نے فرمایا: ”ہاں، صرف ایک کلمہ“، انہوں نے پوچھا: وہ کیا ہے؟ آپ صلی اللہ علیہ و آلہ وسلم نے فرمایا: ” «لا اله الا الله» (اللہ کے سوا کوئی معبود نہیں)“، راوی کہتے ہیں: اس پر وہ کہنے لگے: کیا اس نے تمام معبودوں کا ایک ہی معبود بنا دیا، یہ تو بڑی عجیب بات ہے؟ اور ان کے بارے میں یہ آیات نازل ہوئیں: ﴿ص وَالْقُرْآنِ ذِي الذِّكْرِ﴾ سے لے کر اس فرمان تک: ﴿إِنْ هَذَا إِلَّا اخْتِلَاقٌ﴾ ”یہ تو محض ایک من گھڑت بات ہے۔“ [سورة ص: 1 - 7]
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3659]