Mustadrak al-Hakim

سیدنا اسامہ بن زید رضی اللہ عنہ سے روایت ہے کہ میں مسجد میں تھا کہ سیدنا عباس اور سیدنا علی رضی اللہ عنہما میرے پاس آئے اور کہا: ”اے اسامہ! ہمارے لیے رسول اللہ صلی اللہ علیہ و آلہ وسلم سے (ملنے کی) اجازت طلب کرو،“ میں نے نبی کریم صلی اللہ علیہ و آلہ وسلم کی خدمت میں حاضر ہو کر عرض کیا کہ عباس اور علی (رضی اللہ عنہما) اجازت مانگ رہے ہیں، آپ صلی اللہ علیہ و آلہ وسلم نے پوچھا: ”کیا تم جانتے ہو وہ کس کام سے آئے ہیں؟“ میں نے کہا: ”اللہ کی قسم! میں نہیں جانتا،“ آپ صلی اللہ علیہ و آلہ وسلم نے فرمایا: ”لیکن میں جانتا ہوں، انہیں اندر آنے دو،“ وہ دونوں حاضر ہوئے اور عرض کیا: ”یا رسول اللہ! ہم آپ سے یہ پوچھنے آئے ہیں کہ آپ کے اہل خانہ میں آپ کو سب سے زیادہ محبوب کون ہے؟“ آپ صلی اللہ علیہ و آلہ وسلم نے فرمایا: ”فاطمہ بنت محمد میرے اہل خانہ میں مجھے سب سے زیادہ محبوب ہیں،“ انہوں نے عرض کیا: ”یا رسول اللہ! ہم آپ سے فاطمہ رضی اللہ عنہا کے بارے میں نہیں پوچھ رہے،“ آپ صلی اللہ علیہ و آلہ وسلم نے فرمایا: ”پھر اسامہ بن زید جس پر اللہ نے بھی انعام کیا اور میں نے بھی۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ التَّفْسِيرِ/حدیث: 3604]