Mustadrak al-Hakim

سیدنا عبد اللہ بن مسعود رضی اللہ عنہ سے روایت ہے کہ رسول اللہ صلی اللہ علیہ و آلہ وسلم نے مجھے سورہ (حم) پڑھائی، پھر میں شام کے وقت مسجد گیا تو وہاں ایک گروہ بیٹھا ہوا تھا، میں نے ان میں سے ایک شخص سے کہا: مجھے (یہ سورت) پڑھ کر سناؤ، تو وہ اسے ایسے حروف (الفاظ) کے ساتھ پڑھ رہا تھا جو میں نہیں پڑھتا تھا، میں نے اس سے پوچھا: تمہیں یہ کس نے پڑھائی ہے؟ اس نے کہا: مجھے رسول اللہ صلی اللہ علیہ و آلہ وسلم نے پڑھائی ہے، پھر ہم رسول اللہ صلی اللہ علیہ و آلہ وسلم کی خدمت میں حاضر ہوئے جبکہ آپ کے پاس ایک صاحب بیٹھے تھے، میں نے عرض کی: ہماری قرات میں اختلاف ہو گیا ہے، یہ سن کر رسول اللہ صلی اللہ علیہ و آلہ وسلم کے چہرہ مبارک کا رنگ بدل گیا اور جب میں نے اختلاف کا ذکر کیا تو آپ نے اسے (اپنے دل میں) ناپسند فرمایا، پھر آپ صلی اللہ علیہ و آلہ وسلم نے فرمایا: ”تم سے پہلے لوگوں کو (دین میں) اختلاف ہی نے ہلاک کیا تھا“، پھر آپ صلی اللہ علیہ و آلہ وسلم نے سیدنا علی رضی اللہ عنہ سے سرگوشی کی، تو سیدنا علی رضی اللہ عنہ نے فرمایا: رسول اللہ صلی اللہ علیہ و آلہ وسلم تمہیں حکم دیتے ہیں کہ تم میں سے ہر شخص اسی طرح پڑھے جیسے اسے سکھایا گیا ہے، چنانچہ ہم وہاں سے چلے گئے جبکہ ہم میں سے ہر شخص ایسے حروف پڑھ رہا تھا جو اس کا ساتھی نہیں پڑھتا تھا۔ [المستدرك على الصحيحين/كِتَابُ التَّفْسِيرِ/حدیث: 2921]