Mustadrak al-Hakim

سیدہ عائشہ رضی اللہ عنہا سے روایت ہے، وہ بیان کرتی ہیں کہ جب سیدہ خدیجہ رضی اللہ عنہا کا انتقال ہو گیا تو مکہ میں عثمان بن مظعون کی اہلیہ خولہ بنت حکیم رضی اللہ عنہا نے عرض کیا: اے رسول اللہ! کیا آپ نکاح نہیں کریں گے؟ آپ صلی اللہ علیہ و آلہ وسلم نے فرمایا: ”کس سے؟“ انہوں نے عرض کیا: اگر آپ چاہیں تو کنواری سے اور چاہیں تو بیوہ سے، آپ صلی اللہ علیہ و آلہ وسلم نے دریافت فرمایا: ”کنواری کون ہے؟“ انہوں نے عرض کیا: اللہ کی مخلوق میں آپ کو سب سے زیادہ محبوب شخص کی بیٹی عائشہ بنت ابی بکر، آپ صلی اللہ علیہ و آلہ وسلم نے پوچھا: ”اور بیوہ کون ہے؟“ عرض کیا: سودہ بنت زمعہ بن قیس، جو آپ پر ایمان لائیں اور آپ کی لائی ہوئی شریعت کی اتباع کی، آپ صلی اللہ علیہ و آلہ وسلم نے فرمایا: ”جاؤ اور ان دونوں سے میرا تذکرہ کرو“ پس وہ آئیں اور ابوبکر کے گھر داخل ہوئیں اور کہا: اے ابوبکر! اللہ آپ کے لیے کتنی خیر اور برکت لایا ہے، مجھے رسول اللہ صلی اللہ علیہ و آلہ وسلم نے بھیجا ہے کہ میں ان کے لیے عائشہ کا پیغامِ نکاح دوں، انہوں نے کہا: رسول اللہ صلی اللہ علیہ و آلہ وسلم کو میرے پاس بلا لاؤ، پس انہوں نے آپ صلی اللہ علیہ و آلہ وسلم کو بلایا، آپ صلی اللہ علیہ و آلہ وسلم تشریف لائے تو انہوں نے نکاح کر دیا، اور اس وقت عائشہ سات سال کی تھیں۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ النِّكَاحِ/حدیث: 2738]