Mustadrak al-Hakim

سیدنا عبداللہ بن جعفر رضی اللہ عنہ سے روایت ہے، انہوں نے کہا کہ ایک دن رسول اللہ صلی اللہ علیہ و آلہ وسلم نے مجھے اپنے پیچھے سواری پر بٹھایا اور مجھ سے چپکے سے ایک ایسی بات فرمائی جو میں کسی کو نہیں بتاؤں گا، راوی کہتے ہیں کہ رسول اللہ صلی اللہ علیہ و آلہ وسلم رفعِ حاجت کے لیے کسی اونچی جگہ یا کھجوروں کے جھنڈ کے پیچھے چھپنا زیادہ پسند فرماتے تھے، ایک مرتبہ آپ صلی اللہ علیہ و آلہ وسلم انصار کے ایک شخص کے باغ میں داخل ہوئے تو وہاں ایک اونٹ موجود تھا، جب اونٹ نے نبی کریم صلی اللہ علیہ و آلہ وسلم کو دیکھا تو وہ بلبلانے لگا اور اس کی آنکھوں سے آنسو بہنے لگے، نبی کریم صلی اللہ علیہ و آلہ وسلم اس کے پاس تشریف لائے اور اس کے سر کے پچھلے حصے پر ہاتھ پھیرا تو وہ پرسکون ہو گیا، آپ صلی اللہ علیہ و آلہ وسلم نے پوچھا: ”اس اونٹ کا مالک کون ہے؟ یہ کس کا اونٹ ہے؟“ انصار کا ایک نوجوان حاضر ہوا اور عرض کی: اے اللہ کے رسول! یہ میرا ہے، آپ صلی اللہ علیہ و آلہ وسلم نے فرمایا: ”کیا تم اس بے زبان جانور کے معاملے میں اللہ سے نہیں ڈرتے جس کا اللہ نے تمہیں مالک بنایا ہے؟ اس نے مجھ سے شکایت کی ہے کہ تم اسے بھوکا رکھتے ہو اور اس سے بہت زیادہ کام لے کر اسے تھکاتے ہو۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْجِهَادِ/حدیث: 2516]