Mustadrak al-Hakim

سیدنا زید بن ثابت رضی اللہ عنہ سے روایت ہے، انہوں نے کہا کہ میں رسول اللہ صلی اللہ علیہ و آلہ وسلم کے پہلو میں بیٹھا ہوا تھا کہ آپ صلی اللہ علیہ و آلہ وسلم پر سکینہ (وحی کی کیفیت) طاری ہو گئی، تو رسول اللہ صلی اللہ علیہ و آلہ وسلم کی ران میری ران پر آ پڑی، میں نے رسول اللہ صلی اللہ علیہ و آلہ وسلم کی ران کے بوجھ سے زیادہ بھاری کوئی چیز محسوس نہیں کی، پھر جب وہ کیفیت ختم ہوئی تو آپ صلی اللہ علیہ و آلہ وسلم نے فرمایا: ”لکھو“، چنانچہ میں نے شانے کی ہڈی پر لکھا: ﴿لَا يَسْتَوِي الْقَاعِدُونَ مِنَ الْمُؤْمِنِينَ وَالْمُجَاهِدُونَ فِي سَبِيلِ اللَّهِ﴾ ”ایمان والوں میں سے (گھروں میں) بیٹھ رہنے والے اور اللہ کی راہ میں جہاد کرنے والے برابر نہیں ہیں“ [سورة النساء: 95] آیت کے آخر تک۔ جب سیدنا ابن ام مکتوم رضی اللہ عنہ نے، جو کہ نابینا تھے، مجاہدین کی فضیلت سنی تو وہ کھڑے ہوئے اور عرض کی: اے اللہ کے رسول! ان مومنین کا کیا حکم ہے جو جہاد کی استطاعت نہیں رکھتے؟ جب انہوں نے اپنی بات مکمل کی تو رسول اللہ صلی اللہ علیہ و آلہ وسلم پر دوبارہ سکینہ طاری ہو گئی اور آپ صلی اللہ علیہ و آلہ وسلم کی ران میری ران پر آ پڑی، میں نے دوسری مرتبہ بھی وہی بوجھ محسوس کیا جو پہلی بار محسوس کیا تھا، پھر جب آپ صلی اللہ علیہ و آلہ وسلم سے وہ کیفیت ختم ہوئی تو آپ صلی اللہ علیہ و آلہ وسلم نے فرمایا: ”اے زید! پڑھو“، میں نے پڑھا: ﴿لَا يَسْتَوِي الْقَاعِدُونَ مِنَ الْمُؤْمِنِينَ﴾، تو رسول اللہ صلی اللہ علیہ و آلہ وسلم نے فرمایا: ﴿غَيْرُ أُولِي الضَّرَرِ﴾ ”سوائے معذور لوگوں کے“ (پھر پوری آیت مکمل فرمائی)۔ سیدنا زید رضی اللہ عنہ کہتے ہیں کہ اللہ تعالیٰ نے یہ الفاظ الگ سے نازل فرمائے تو میں نے انہیں پہلے والے الفاظ کے ساتھ ملحق کر دیا، اس ذات کی قسم جس کے قبضے میں میری جان ہے! گویا میں ابھی بھی شانے کی ہڈی کے شگاف کے پاس ان ملحقہ الفاظ کو دیکھ رہا ہوں۔
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كِتَابُ: الْجِهَادِ/حدیث: 2459]