Mustadrak al-Hakim

سیدنا ابوسعید خدری رضی اللہ عنہ بیان کرتے ہیں کہ جب نبی کریم صلی اللہ علیہ و آلہ وسلم (مدینہ) تشریف لائے تو ہمارا طریقہ یہ تھا کہ جب ہم میں سے کسی کی وفات کا وقت قریب آتا تو ہم نبی کریم صلی اللہ علیہ و آلہ وسلم کو مطلع کرتے، آپ صلی اللہ علیہ و آلہ وسلم تشریف لاتے اور اس کے لیے استغفار کرتے یہاں تک کہ جب اس کی روح قبض ہو جاتی تو آپ صلی اللہ علیہ و آلہ وسلم اور آپ کے ساتھی تدفین تک وہیں رہتے، بسا اوقات اللہ کے نبی صلی اللہ علیہ و آلہ وسلم کو وہاں بہت دیر تک رکنا پڑتا، جب ہمیں اس بات سے آپ صلی اللہ علیہ و آلہ وسلم کے لیے مشقت کا اندیشہ ہوا تو بعض لوگوں نے بعض سے کہا: اگر ہم نبی کریم صلی اللہ علیہ و آلہ وسلم کو اس وقت تک اطلاع نہ دیں جب تک کہ روح قبض نہ ہو جائے، اور روح قبض ہونے کے بعد آپ کو بتائیں تو اس میں آپ صلی اللہ علیہ و آلہ وسلم پر مشقت اور طویل انتظار کا بوجھ نہیں ہوگا، چنانچہ ہم نے ایسا ہی کرنا شروع کر دیا اور میت کے فوت ہونے کے بعد آپ صلی اللہ علیہ و آلہ وسلم کو مطلع کرتے، آپ صلی اللہ علیہ و آلہ وسلم تشریف لاتے اور اس کی نمازِ جنازہ پڑھاتے، پھر کبھی آپ صلی اللہ علیہ و آلہ وسلم واپس تشریف لے جاتے اور کبھی تدفین تک وہیں رکتے، ہم ایک عرصے تک اسی طریقے پر رہے، پھر ہم نے آپس میں کہا: اگر ہم نبی کریم صلی اللہ علیہ و آلہ وسلم کو تکلیف نہ دیں اور اپنے جنازے خود آپ صلی اللہ علیہ و آلہ وسلم کے پاس لے جائیں تاکہ آپ صلی اللہ علیہ و آلہ وسلم اپنے گھر کے پاس ہی ان کی نمازِ جنازہ پڑھا دیا کریں تو یہ آپ صلی اللہ علیہ و آلہ وسلم کے لیے زیادہ سہولت کی بات ہوگی، چنانچہ ہم نے یہی طریقہ اپنا لیا اور وہ معاملہ آج تک اسی طرح چلا آ رہا ہے۔
یہ حدیث شیخین کی شرط پر صحیح ہے، لیکن انہوں نے اسے روایت نہیں کیا، اور میں نے اسے پہلے مختصراً املاء کروایا تھا۔ [المستدرك على الصحيحين/كِتَابُ الْجَنَائِزِ/حدیث: 1365]