سیدنا اسامہ بن شریک رضی اللہ عنہ کہتے ہیں: میں نبی صلی اللہ علیہ و آلہ وسلم کے پاس موجود تھا کہ آپ صلی اللہ علیہ و آلہ وسلم کے پاس دیہات سے کچھ لوگ آئے، وہ آپ صلی اللہ علیہ و آلہ وسلم کی دائیں بائیں جانب سے پوچھ رہے تھے: یا رسول اللہ! کیا یوں کرنے میں کوئی حرج ہے؟ کیا یوں کرنے میں کوئی حرج ہے؟ آپ صلی اللہ علیہ و آلہ وسلم نے فرمایا: ”اللہ تعالیٰ نے تمام تنگیاں معاف کر دیں، مگر جو شخص کسی مسلمان مرد سے ظلم کے ساتھ قرض لے اس میں اس پر حرج ہو گا اور وہ ہلاک ہو گا۔“ کہنے لگے: کیا ہم فلاں چیز سے علاج کروا سکتے ہیں؟ آپ صلی اللہ علیہ و آلہ وسلم نے فرمایا: ”اللہ کے بندو! علاج کراؤ، اللہ تعالیٰ نے جو بیماری نازل کی تو اس کی شفا بھی نازل فرمائی، مگر ایک بیماری یعنی بڑھاپا۔“ کہنے لگے: یا رسول اللہ! انسان کو جو کچھ دیا گیا ہے اس میں سے سب سے بہتر چیز کون سی ہے؟ آپ صلی اللہ علیہ و آلہ وسلم نے فرمایا: ”وہ اچھے اخلاق ہیں۔“ [معجم صغير للطبراني/كِتَابُ الطِّبِّ/حدیث: 1090]