سیدنا انس رضی اللہ عنہ کہتے ہیں: بلال رضی اللہ عنہ کو اذان کے جفت کہنے اور اقامت کے طاق کہنے کا حکم دیا گیا۔ [معجم صغير للطبراني/كِتَابُ الْأَذَان/حدیث: 163]

سیدنا سعد رضی اللہ عنہ کہتے ہیں: نبی صلی اللہ علیہ و آلہ وسلم نے سیدنا بلال رضی اللہ عنہ کو حکم دیا کہ جب وہ اذان کہیں تو اپنی انگلیاں اپنے کانوں میں کر لیں اور کہا: ”یہ چیز تیری آواز کو بلند کر دے گی۔“ [معجم صغير للطبراني/كِتَابُ الْأَذَان/حدیث: 164]

اسی سند سے ہے کہ سیدنا بلال رضی اللہ عنہ دو دو کلمے اذان کہتے اور تشہد دوہری کہتے، قبلے کی طرف منہ کرتے تو کہتے: ﴿أَشْهَدُ أَنْ لَا إِلٰهَ إِلَّا اللّٰهُ﴾ دو دفعہ۔ ﴿أَشْهَدُ أَنَّ مُحَمَّدًا رَسُوْلُ اللّٰهِ﴾ دو دفعہ۔ پھر دوہراتے اور کہتے جب کہ آپ قبلہ رخ ہوتے: ﴿أَشْهَدُ أَنْ لَا إِلٰهَ إِلَّا اللّٰهُ﴾ دو دفعہ، ﴿أَشْهَدُ أَنَّ مُحَمَّدًا رَسُوْلُ اللّٰهِ﴾ دو دفعہ۔ پھر دائیں جانب مڑ کر کہتے: ﴿حَيَّ عَلَى الصَّلَاةِ﴾ دو دفعہ۔ پھر بائیں جانب مڑ کر کہتے: ﴿حَيَّ عَلَى الْفَلَاحِ﴾ دو دفعہ۔ پھر قبلہ کی طرف رخ کیے ہوئے ہی ﴿اللّٰهُ أَكْبَر، اللّٰهُ أَكْبَر، لَا إِلٰهَ إِلَّا اللّٰهُ﴾ کہتے۔ آپ رضی اللہ عنہ کی اقامت منفرد ہوتی، ﴿قَدْ قَامَتِ الصَّلَاةُ﴾ ایک دفعہ کہتے۔ اور وہ جمعہ کے دن جمعہ کی اذان رسول اللہ صلی اللہ علیہ و آلہ وسلم کے زمانے میں اس وقت کہتے جب سایہ تسمہ کے برابر ہو جاتا۔ [معجم صغير للطبراني/كِتَابُ الْأَذَان/حدیث: 165]