المعجم الصغیر للطبرانی

سیدنا جابر بن عبداللہ رضی اللہ عنہما کہتے ہیں: مجھے میرے ماموں جد بن قیس نے رسول اللہ صلی اللہ علیہ و آلہ وسلم کی طرف بطورِ وفد کے عقبہ کی رات میں انصار کی طرف سے ستر آدمیوں میں سوار کیا، تو ہمارے پاس نبی صلی اللہ علیہ و آلہ وسلم تشریف لائے۔ آپ صلی اللہ علیہ و آلہ وسلم کے ساتھ آپ صلی اللہ علیہ و آلہ وسلم کے چچا سیدنا عباس رضی اللہ عنہ بھی تھے۔ آپ صلی اللہ علیہ و آلہ وسلم نے فرمایا: ”اے چچا جان! اپنے ماموؤں سے عہد لو۔“ تو آپ صلی اللہ علیہ و آلہ وسلم سے ستر آدمیوں نے کہا: اے محمد! اپنے رب کے لیے اور اپنے لیے ہم سے جو چاہتے ہو مانگ لو۔ تو آپ صلی اللہ علیہ و آلہ وسلم نے فرمایا: ”میں اپنے رب کے لیے تم سے یہ مانگتا ہوں کہ تم اس کی بندگی کرو اور اس کے ساتھ کسی کو شریک نہ کرو، اور میں اپنے لیے تم سے یہ مانگتا ہوں کہ میری بھی اسی طرح حفاظت کرو جس طرح تم اپنی جان کی حفاظت کرتے ہو۔“ وہ کہنے لگے کہ اگر ہم اس طرح کریں تو ہمیں کیا ملے گا؟ آپ صلی اللہ علیہ و آلہ وسلم نے فرمایا: ”تمہارے لیے جنت ہو گی۔“ [معجم صغير للطبراني/كِتَابُ الْإِيمَان/حدیث: 63]