المعجم الصغیر للطبرانی

سیدنا ابوحمید ساعدی رضی اللہ عنہ کہتے ہیں: نبی صلی اللہ علیہ و آلہ وسلم نے ایک آدمی سے پکی ہوئی کھجور بطور قرض لیں، جب وہ آپ صلی اللہ علیہ و آلہ وسلم سے مانگنے آیا تو آپ صلی اللہ علیہ و آلہ وسلم نے فرمایا: ”ابھی تو میرے پاس کچھ نہیں، اگر چاہو تو کچھ اور مہلت دے دو تاکہ کہیں سے کچھ آجائے تو ہم تجھے دے دیں گے۔“ تو وہ آدمی کہنے لگا: وا غدراء یعنی یہ تو دھوکہ ہے، تو سیدنا عمر رضی اللہ عنہ غضب ناک ہو گئے، نبی صلی اللہ علیہ و آلہ وسلم نے فرمایا: ”عمر! تم ہمیں چھوڑ دو کیونکہ حق دار کو بات کرنے کی اجازت ہے۔ جاؤ خولہ بنت حکیم انصاریہ کے پاس اور اس سے کچھ کھجوریں لاؤ۔“ وہ وہاں چلے گئے تو وہ کہنے لگیں: اللہ کی قسم! میرے پاس صرف ضرورت کی کھجوریں ہیں۔ انہوں نے آ کر نبی صلی اللہ علیہ و آلہ وسلم کو بتایا، آپ صلی اللہ علیہ و آلہ وسلم نے فرمایا: ”وہ ان سے لے کر قرض ادا کرو۔“ جب انہوں نے قرض ادا کر دیا تو نبی صلی اللہ علیہ و آلہ وسلم کے پاس آئے تو آپ صلی اللہ علیہ و آلہ وسلم نے پوچھا: ”کیا تم نے پورا پورا دے دیا؟“ انہوں نے کہا: جی ہاں! پورا پورا دے دیا، اور عمدہ دیا، تو آپ صلی اللہ علیہ و آلہ وسلم نے فرمایا: ”اللہ تعالیٰ کے اچھے بندے وہ ہوتے ہیں جو پورا اور عمدہ دینے والے ہوں۔“ [معجم صغير للطبراني/كِتَابُ الْبِيُوع/حدیث: 549]